«Մանչեսթեր Յունայթեդի» նախկին ու «Էվերթոնի» ներկայիս հարձակվող Ուեյն Ռունին ներկա է եղել «Sky Sports»-ի եթերում ընթացող «Monday Night Football» հաղորդմանը, որի ժամանակ կարծիք է հայտնել «Մանչեսթեր Սիթիի» մասին: 32-ամյա ֆուտբոլիստը գնահատել է «քաղաքայինների» գլխավոր մարզիչ Խոսեպ Գվարդիոլայի կատարած աշխատանքը:
«Այս մրցաշրջանում «Մանչեսթեր Յունայթեդն» արդեն չի կարող հասնել «Սիթիին»: Եթե անկեղծ լինեմ, չեմ հավատում, որ մյուս տարի նույնպես կկարողանա դա անել: «Մանչեսթեր Սիթին» մոտենում է 4-5 տարի առաջվա «Բարսելոնայի» խաղամակարդակին: Ցավով եմ ասում, բայց ժամանակ առ ժամանակ նրանք կատարյալ ֆուտբոլ են ցուցադրում:
Գվարդիոլան լուրջ հիմքեր է դնում ակումբում, որպեսզի այն նմանվի նրա ղեկավարած «Բարսային»: Նրանք այդ ճանապարհը վստահորեն են անցնում: Ամռանը ևս 1-2 նորեկներ կմիանան «քաղաքայիններին», և նրանք անհասանելի կդառնան»,- ասել է անգլիացին:
