Լրագրողներն իրենց ուժերը փորձեցին լեռնադահուկային սպորտում

Մինչ կորեական Փհենչհանում լեռնադահուկորդները փորձում են նվաճել 23-րդ ձմեռային Օլիմպիական խաղերի մեդալները, հայ լրագրողները սեփական մաշկի վրա զգացին լեռներից իջնելու հաճույք-փորձությունը։ «Ծաղկաձորի ճոպանուղին» և «Սպորտը բոլորի համար» հասարակական կազմակերպությունն այսօր լրագրողներին ներկայացրին լեռնադահուկային սպորտի կանոնները և ուսուցում կազմակերպեցին։ 

Ճոպանուղու աշխատակցներից Մհեր Մուրադյանը լրագրողների հետ զրույցում նշեց, որ Ծաղկաձոր հաճախում են զբոսաշրջիկներ տարբեր երկրներից, սակայն մեծամասնությունը ռուսները և իրանցիներն են․

«Ճոպանուղին օրական 2000-3000 մարդու է սպասարկում։ Փետրվարի 17-24-ը ռուսների մոտ արձակուրդներ են, և զբոսաշրջիկների մեծ հոսք ենք սպասում դեպի Ծաղկաձոր։ Իսկ մարտ ամսին ավելի շատ իրանցիներ են գալիս։ Ունենք 3 բարդության սահուղիներ՝ ընդհանուր 33 կմ երկարությամբ։ Այս տարի գործարկվել է նաև առանձին ուղի ձմեռային ամենագնացների համար»,- ասաց Մհեր Մուրադյանը։

Բացի այդ, գործարկվել է գիշերային ճոպանուղի, որը դահուկասպորտի սիրահարներին հնարավորություն է տալիս սահել նաև գիշերային ժամերին։ 

ՀԱՕԿ պաշտոնական լրատվական կայքի լրագրող Անի Գալստյանը, ով միջոցառման մասնակիցներից էր, Sport.Times.am-ի հետ զրույցում կիսվեց տպավորություններով․

«Առաջին անգամ էի սահում դահուկով, միշտ վախեցել եմ: Առաջին շրջանից հետո հասկացա, որ անգամ ինքնուրույն կարող եմ սահել լեռներից: Պարզապես պետք է ճիշտ կատարել մարզչի ցուցումները, լինել համարձակ և կստացվի: Անպայման էլի եմ սահելու»:

Հավելենք, որ ՀԱՕԿ նախագահ Գագիկ Ծառուկյանի հանձնարարությամբ ընթացքի մեջ են Ծաղկաձորի գերժամանակակից օլիմպիական մարզահամալիրի նախագծման աշխատանքները: Բարեփոխումները կշարունակվեն նաև Ճոպանուղու տարածքում: Նախատեսվում է կառուցել 4700 մետր երկարությամբ նոր ճոպանուղի: Թեղենիսի լանջին էլ կկառուցվի լողավազան, իսկ ամռանը այցելուները հնարավորություն կունենան զբաղվելու լեռնային հեծանվասպորտով:

Հասմիկ Գրիգորյան