«Ճիշտ ապրելը ես չեմ համարում գողական». Առաքել Մովսիսյան

«Իրատես de facto» թերթը զրուցել է ԱԺ ՀՀԿ խմբակցության անդամ Առաքել Մովսիսյանի (Շմայս) հետ.

«Օրերս ոստիկանապետ Վլադիմիր Գասպարյանը Գյումրիի հայտնի իրադարձությունների առնչությամբ նկատել էր, որ այդ ամենը «գողական մտածողության» հետեւանք է: Ի՞նչ եք կարծում’ «գողական մտածողություն» միայն Գյումրիո՞ւմ է, Երեւանում, Էջմիածնում նման բան չկա՞:

Չես կարա ասես:

Այսի՞նքն:

Ոստիկանապետի ասածն այլ բան է, Ձեր հարցը’ այլ: Նրա ասածները չեմ կարող քննարկել կամ վերաձեւակերպել: Իմ կողմից կասեմ. տարբեր տեսակի ապրող մարդկային երեւույթներ կան, ինչու չէ’ եւ գողական, եւ պալիտիկի, եւ կառավարական աշխարհում: Ցանկացած ճիշտ ապրող իրեն համարում ա ճիշտ մարդ, դուք համարում եք’ գողական: Ճիշտ ապրելը ես չեմ համարում գողական: Իսկ Գյումրիի հետ կապված դեպքերի առումով էլ ասեմ, որ բոլոր տեղերում են էդպիսի բաներ լինում: Միայն Հայաստանում չէ էդպես, Վրաստանում, Եվրոպայում: Սաղ տեղերում էլ ամեն մարդ պայքարում ա իր ինքնասիրության համար, որ ճիշտ ապրելակերպի միջոց գտնի:

Ոստիկանապետը նաեւ ասաց, որ երբեմն պատգամավորներ են դիմում իր տեղակալներին այս կամ այն հարցով միջնորդության համար: Դուք երբեւէ դիմե՞լ եք ոստիկանապետին կամ նրա տեղակալներին:

Նախ առաջինը ես ինձ թույլ չեմ տա նման դեպքերի հետ կապված դիմեմ ոչ միայն Վովա Գասպարյանին, այլեւ ցանկացած ոստիկանի: Պատկերացրեք, ձեր ընտանիքում ինչ-որ մեկին սպանում են, ի՞նչ երեսով կդիմես: Սա միայն օրենքի տառին համապատասխան պիտի գնա: Բայց դատապարտում եմ մեկը մյուսի վրա ձեռք բարձրացնելը: Համենայն դեպս, հայ կորցնելը դաժան բան ա: Հայի համար ենք արյուն թափել, հայ սպանելը ճիշտ չէ, անկախ ամեն ինչից կարելի ա զիջել, հասկացնել, ներել: Թշնամությունը լավ բան չէ: Բա ի՞նչ ասեր Վովա Գասպարյանը, ասեր’ ապրեք, տղանե՞ր: Իհարկե, պիտի միանշանակ դատապարտեր:

Մամուլը հաճախ է գրում, որ այսինչ, այնինչ դեպքի համար պատգամավոր է միջնորդել:

-Իհարկե, դեպքեր են լինում, որ դիմում ենք տարածքային ոստիկանության պետին: Ինչի՞ համար ոստիկանապետին անհանգստացնենք: Կարող ա շփոթմունք ա, կամ նման այլ բան: Ինչո՞ւ չմիջնորդենք: Տարածքի բաժանմունքների պետերի մասին ա խոսքը: Եթե դրսի բան է, ինձ չի վերաբերվում, եթե իմ տարածքի բնակչին է առնչվում, որը անշնորհքություն, գողություն չի արել, չի սպանել, ինչի՞ չդիմեմ: Եթե նարկաման ա, գող-ավազակ, մարդասպան ա, ինչի՞ դիմեմ: Թող ինքը գնա պատասխան տա:

Ի դեպ, ԱԺ-կառավարություն հարցուպատասխանի ժամանակ հաճախ ենք տեսնում, որ Դուք պաշտպանության նախարարին ինչ-որ թուղթ եք ներկայացնում, այլ խոսքով’ հարցի առնչությամբ միջնորդում եք: Ի՞նչ եք նրանից այդքան խնդրում:

Մենք միասին պատերազմ ենք անցել: Որոշ հարցեր կան, որոնց համար խնդրանքով, հարցով դիմում եմ: Ասեմ’ իմանաք, դա ինձ թույլ ա տրվում: Խորհուրդ եմ հարցնում պաշտպանության նախարարից: Որպեսզի հարց չտամ, չխանգարեմ, գրավոր ենք իրար հետ շփվում: Ասենք, հարցնում եմ’ Ռուսաստան ակադեմիա գնալուց ինչ կարգի կրթություն ունեցող երեխաներ են պետք եւ այլն…»,- մեջբերում է «Իրատես de facto»-ն (Մանրամասները՝ թերթի այսօրվա համարում):