Չարենցի դեռևս անտիպ ժառանգություն կա, իսկ պահպանված ձեռագրերը ծանր վիճակում են
Նմանատիպ
Եղիշե Չարենցի ստեղծագործությունների դեռեւս անտիպ ժառանգություն կա, որ պահվում է Գեւորգ Էմինի պահոցում: Այս մասին այսօր «Տեսակետ» մամուլի ակումբում լրագրողների հետ հանդիպմանը հայտարարեց գրականագետ Դավիթ Գասպարյանը:
«Այդ ստեղծագործություններից հայտնի են ինչ-ինչ վերնագրեր, բայց այդ պահոցը չի վաճառվում: Չարենցի մեծ դստերը՝ Արփիկին, ասել եմ ՝հավաքենք, տպագրենք, բայց նա ասում էր՝ սա էլ թող մնա երեխաներին»,-պատմեց Դավիթ Գասպարյանը:
Նա նշեց, որ «Գիրք ճանապարհի» ժողովածուի տպագրությունը դեռեւս Չարենցի կենդանության օրոք կասեցվել է, այնուհետեւ՝ տպագրվել առանց որոշ ստեղծագործությունների, որոնք դուրեկան չէին սովետական «Գլավլիտ»-ին:
«Ոմանք ասում են, թե ում է պետք անտիպ ժառանգությունը: Նման մարդիկ մոլորյալներ են: Այն, ինչ պահպանվել է Չարենցից, քիչ չէ, բայց տպագրվածն էլ դեռեւս ամբողջը չէ»,-համոզմունք հայտնեց գրականագետը:
Դավիթ Գասպարյանը նաեւ նշեց, որ Չարենցի պահպանված ձեռագրերը բավականին ծանր վիճակում են. «Ժամանակին, երբ դրանք հանվեցին հողի տակից, թուղթը ածխացել էր, ձեռքիդ մեջ փշրվում էր: Դրանք ամրացվեցին լուծույթով, բայց թանաքը «լուծվեց» թղթին ու դարձավ անընթեռնելի»:
Հիշեցնենք, որ վաղը Եղիշե Չարենցի 121-ամյակն է. «Չարենցի շուրջ հետաքրքրությունը վերջին 20 տարում բավականին մեծացել է: Չարենցյան հայտնագործությունների եւ ժառանգության ամփոփման աշխատանքները շարունակվում են»,-նշեց Դավիթ Գասպարյանը:
Հետևեք մեզ նաև Telegram-ում