Հայաստանի նոր Սահմանադրությունը հիմք դարձավ արմատապես փոխելու քաղաքական համակարգը, քաղաքական ուժերի պայքարի բովանդակությունը, պետական համակարգում դերակատարների անելիքները: Ազգային ժողովում իր ելույթում նման համոզմունք հայտնեց ՀՀ վարչապետի թեկնածու Սերժ Սարգսյանը: «Վերջին օրերին և ամիսներին մենք ականատեսն ենք բարեփոխված Սահմանադրության բովանդակությունն ու փիլիսոփայությունը կյանքի կոչելուն: Մենք ձեզ հետ միասին մասնակիցն ենք նոր սկզբի: Այստեղ շատ կարևոր է, թե ինչ մեկնարկ է տրվում: Խորհրդարանական կառավարման ձևը իր ավարտուն տեսքի բերելու համար մենք այսօր խորհրդարանական եղանակով կազմավորում ենք կառավարություն, որի առաջին քայլն Ազգային ժողովի կողմից վարչապետ ընտրելն է»,- նշեց Սերժ Սարգսյանը:
Վարչապետի թեկնածուն ընդգծեց, որ անկախության առաջին տարիներին գերակշռում էր այն մոտեցումը, որ կայունություն ունենալու համար պետք է ապավինել նախագահի իշխանության դերակատարմանը, այդ տարիներին ավելի մեծ էր վախը քաոսային հնարավոր իրավիճակներից, քան նախագահին լայն լիազորություններով օժտելուց: «Այսօր ակնառու է, որ պատմական զարգացման ներկա փուլում շարունակում է մնալ հավասարակշված, վերահսկելի իշխանություն ունենալը»,- ասաց Սերժ Սարգսյանը:
Նա հավելեց, որ կառավարման նոր համակարգում ԱԺ-ն՝ որպես օրենսդիր իշխանություն ձևավորում է կառավարություն և վերահսկողություն է իրականացնում նրա նկատմամբ, իսկ դատարաններն անկախ են և հաշվետու են միայն օրենքի առջև:
