ԱՊԼ․ «Արսենալը» պարտվեց, «Չելսին» միավորներ կորցրեց, «Ման․ Սիթին» և «Տոտենհեմը» հաղթեցին (տեսանյութ)
Նմանատիպ
Այսօր կայացան Անգլիայի Պրեմիեր լիգայի նախորդ տուրերից հետաձգված մի շարք հանդիպումներ։
31-րդ տուրից հետաձգված՝ «Լեսթեր» – «Արսենալ» խաղում դաշտի տերերը 3։1 հաշվով հաղթանակ տոնեցին։ 14-րդ րոպեին Կելեչի Իխեանաչոն առաջ մղեց «աղվեսներին», իսկ մեկ րոպե անց հյուրերը մնացին 10 հոգով՝ կարմիր քարտ ստացավ Կոնստանտինոս Մավրոպանոսը։ Երկրորդ խաղակեսի մեկնարկում Պյեր-Էմերիկ Օբամեյանգը վերականգնեց հավասարությունը, սակայն թվային առավելություն ունեցող «Լեսթերին» հաջողվեց պատասխանել 2 գոլով՝ աչքի ընկան Ջեյմի Վարդին և Ռիյադ Մարեզը։
Հայաստանի ազգային հավաքականի ավագ Հենրիխ Մխիթարյանը «զինագործների» մեկնարկային կազմում էր և խաղին մասնակցեց առանց փոխարինվելու։
Այս հաղթանակից հետո «Լեսթերը» 47 միավորով 9-րդ տեղում է, իսկ «Արսենալը» մնաց 60 միավորով 6-րդ հորիզոնականում։
Կրկին 31-րդ տուրից հետաձգված խաղում «Տոտենհեմը» նվազագույն հաշվով կարևոր հաղթանակ տոնեց «Նյուքասլի» նկատմամբ։ Լոնդոնի «Ուեմբլի» մարզադաշտում կայացած հանդիպման միակ գոլը խփեց Հարի Քեյնը։
Այս հաղթանակից հետո «Տոտենհեմն» ունի 74 միավոր, զբաղեցնում է մրցաշարային աղյուսակի երրորդ հորիզոնականը և ապահովել է իր տեղը Չեմպիոնների լիգայի հաջորդ խաղարկությունում։ «Նյուքասլը» 41 միավորով 10-րդ տեղում է։
Ի տարբերություն «Տոտենհեմի»՝ «Չելսին» կարևոր միավորներ կորցրեց։ Անտոնիո Կոնտեի թիմը սեփական հարկի տակ ոչ-ոքի (1:1) խաղաց «Հադերսֆիլդի» հետ։ Այժմ «Չելսին» ունի 70 միավոր, զբաղեցնում է մրցաշարային աղյուսակի 5-րդ հորիզոնականը և վերջին տուրից առաջ լավագույն քառյակը եզրափակող «Լիվերպուլին» զիջում է 2 միավորով։
Մեկ այլ խաղում չեմպիոն «Մանչեսթեր Սիթին» 3։1 հաշվով առավելության հասավ «Բրայթոնի» նկատմամբ։ «Քաղաքայիններից» գոլերով աչքի ընկան Դանիլոն, Բերնարդու Սիլվան և Ֆերնանդինյոն և «Բրայթոնի» միակ գոլը խփեց Լեոնարդո Ուլոան։
Այժմ Խոսեպ Գվարդիոլայի թիմն ունի 97 միավոր, իսկ «Բրայթոնը» 40 միավորով 14-րդ տեղում է։
Անգլիայի Պրեմիեր լիգա
«Լեսթեր» – «Արսենալ»՝ 3։1
Գոլերը՝ Իխեանաչո 14՛, Վարդի 76՛ / 11-մետրանոց, Մարեզ 90՛ – Օբամեյանգ 53՛
Հեռացում՝ Մավրոպանոս 15՛
«Տոտենհեմ» – «Նյուքասլ»՝ 1։0
Գոլը՝ Քեյն 50՛
«Չելսի» – «Հադերսֆիլդ»՝ 1։1
Գոլերը՝ Մարկոս Ալոնսո 62՛ – Լորան Դեպուատր 50՛
«Մանչեսթեր Սիթի» – «Բրայթոն»՝ 3։1
Գոլերը՝ Դանիլո 16՛, Սիլվա 34՛, Ֆերնանդինյո 72՛ – Ուլոա 20՛