Ի պատիվ Փաշինյանի քաղաքացին դստերն անվանել է Նիկոլ

ԵՐԵՎԱՆ, 18 ՄԱՅԻՍԻ, araratnews.am: Հայաստանում տեղի ունեցած թավշյա հեղափոխությունից հետո շատերն են իրենց նորածին զավակներին անվանակոչում Նիկոլ՝ ի պատիվ հեղափոխության առաջնորդի:

Բայց Հայաստանում ավելի հետաքրքիր մի բան է եղել. քաղաքացիներից մեկն իր դստեր անունն է դրել Նիկոլ, սկզբում ավելացնելով՝ Ռուզաննա:

Նորածին բալիկը կոչվել է Ռուզաննա Նիկոլ Բաբայան, հայրանունը՝ Էդգար:

Թեմայի առնչությամբ Araratnews.am-ը կապ հաստատեց ԱՎԾ մարդահամարի և ժողովրդագրության բաժնի պետ Կարինե Կույումջյանի հետ, հասկանալու, թե վերջին շրջանում քանի՞ մարդ է իր որդուն կամ դստերն անվանել Նիկոլ:

Կարինե Կույումջյանը նշեց, որ այս պահին դեռ վիճակագրական տվյալներ չկան, առաջիկա ամիսներին նոր հասկանալի կլինի:

Մի բան ակնհայտ է` առաջիկա տարիներին Նիկոլ անունը մոդայիկ կլինի:

Ի պատիվ իրենց սիրելի հերոսների երեխաներին անվանակոչելը բնորոշ է բոլոր ազգերին:

Հիշեցնենք, որ Նիկոլ անունը հայ ժողովրդի մոտ սկսեց տարածվել այսպես կոչված «Նիկոլի թվից» հետո: Ժողովրդական լայն տարածում գտած «Նիկոլի թիվը» 1837 թվականն էր, երբ Նիկոլայ 1-ինը այցելեց ռուսական իշխանության տակ գտնվող Հայաստան: Ի պատիվ ցարի` Հայաստանում Նիկոլայը վերափոխվեց Նիկոլի:

Անունների հետ կապված հետաքրքիր մի վիճակագրություն էլ կա: Հնդկական սերիալների՝ Հայաստանում տարածվելուն զուգահեռ, շատերը ի պատիվ հերոսուհիներից մեկի իրենց նորածին դուստրերին անվանակոչում են Իչակի: