Ինչու էին իրավապահներին հրավիրել Թերլեմեզյանի անվան քոլեջ

Փ. Թերլեմեզյանի անվան գեղարվեստի քոլեջի տնօրեն Աննա Մնացականյանը գրառում էր կատարել ֆեյսբուքի իր էջում՝ դիմելով Մարդու իրավունքների պաշտպանին, ԿԳ նախարար Արայիկ Հարությունյանին եւ լրագրողներին:

«Քոլեջի տարածք են մտել երեք ուսանող և մեկ շրջանավարտ, այնուհետև մուտք գործեցին Շենգավիթի բաժնի ոստիկաններ: Նրանց արդեն միացել են «6-րդ» վարչության ներկայացուցիչներ: Դուք ունեք բոլոր լծակները կատարելու ստուգումներ քոլեջում: Երեկ փոխնախարար Հովհաննես Հովհաննիսյանի հետ հանդիպման ժամանակ խնդրել եմ քոլեջում իրականացնել աուդիտ: Դա ավելի արժանավայել ձև է ճշտելու որևէ տեղեկություն»,- գրել էր տիկին Մնացականյանը՝ նախարարին ուղղված գրառման մեջ:

Aravot.am-ը մեկնաբանություն խնդրեց Աննա Մնացականյանից կատարվածի վերաբերյալ: Նա տեղեկացրեց, որ «Ռեսթարտ» նախաձեռնության ներկայացուցիչներն են իրավապահներին հրավիրել քոլեջ, նաեւ ասաց, թե ինչ պատճառով են դա արել:

«Մուտք ենք բացել Սեւանի փողոցի կողմից, նաեւ կահույք ենք պատրաստել մեր բուֆետի համար, որը նկուղային հատվածում է: Ձեւակերպումների խնդիրներ կային այդ մուտքը բացելու համար, եւ դեռ գործընթացը շարունակվում է: Հետո մեր մտադրությունները փոխվեցին, բայց կահույքն ութ ամսիս է մեր նկուղային հարկում է: «Ռեսթարտի» երիտասարդները զանգել են ոստիկանություն եւ հայտնել, որ մեզ մոտ ընդհատակյա արտադրամաս է գործում, ու հիմա այստեղ են ժամանել «6-րդ» վարչության ու ոստիկանության աշխատակիցները»,-հայտնեց տնօրենը:

Նաեւ հավելեց, որ դռները բացել ամեն ինչ ցույց է տվել իրավապահներին, սակայն հրաժարվել է խոսել՝ առանց լրագրողների ներկայության:

Գոհար ՀԱԿՈԲՅԱՆ