Ոստիկանապետի մեսիջները

Տոնական օրերին, ի թիվս այլ հայտարարությունների, ուշագրավ բացահայտում արեց ոստիկանապետ Վլադիմիր Գասպարյանը, նկատելով, որ Հայաստանի իրավապահ մարմիններին տրվող ֆինանսները «քչություն» են անում: Այդ մասին գրում է «Իրատես de facto» թերթը։

««Ամեն մի մարդու վրա մի ոստիկան կլինի, եթե մարդիկ վճարեն ոստիկանությանը: Բայց հլը որ չեք վճարել նման գումար, սիրելի հարկատուներ, մենք այնտեղ ենք, որտեղ կարող ենք լինել ֆիզիկապես»,- հայտարարել է ոստիկանապետը: Սա համակարգում աշխատողների, հատկապես շարքային ոստիկանների սրտին «դարման» է եղել:

Մեր աղբյուրի դիտարկմամբ, վերջերս ոստիկանները ներքին «խորհրդակցությունների» ժամանակ շատ հաճախ են բարձրաձայնում աշխատավարձի ցածր լինելու հանգամանքը: Ավելին, Վլադիմիր Գասպարյանն այս հայտարարությամբ նաեւ անուղղակիորեն «հասկացնում» է «չուզողներին», որ նախքան իրենց ձախողումները ոստիկանների վատ աշխատանքի վրա բարդելը, բարի լինեն վճարել:

Մեր աղբյուրը պնդում է, որ այս խոսքերը հստակ հասցեատերեր ունեն, որոնք օլիգարխիկ-գործարար շրջանակից են եւ վերջերս ինչ-ինչ առիթներով դժգոհել են ոստիկանությունից, ինչը «եկել-ընկել» է ոստիկանապետի ականջը: Փաստորեն, Գասպարյանը նաեւ «մեսիջներ» է ուղարկել համապատասխան ուղղություններով՚,- գրում է «Իրատես de facto»-ն (Մանրամասները՝ թերթի այսօրվա համարում):