Հովիկ Աբրահամյան. Թող բոլոր ընտանիքներում տիրեն սերն ու փոխըմբռնումը

ՀՀ ԱԺ նախագահ Հովիկ Աբրահամյանը շնորհավորել է Ընտանիքի օրվա կապակցությամբ.

Սիրելի հայրենակիցներ, ջերմորեն շնորհավորում եմ Ընտանիքի օրվա առթիվ:

Որպես տոն՝ այն մեզանում ընդամենը երկու տարեկան է, փոխարենը չափազանց հարուստ պատմություն ու ավանդույթներ ունի:

Մեր ազգային հիմնասյուներից մեկը՝ ընտանիքը գալիս է դարերի խորքից ՝ որպես օջախի, հոգեկան ջերմության, սիրո, հարգանքի եւ հավատարմության, ազգի շարունակականության խորհրդանիշ:

Փոխադարձ սիրո, պատասխանատվության ու նվիրվածության վրա հիմնված ընտանիքը եղել ու մնում է հասարակության հիմքը, հոգեւոր ու բարոյական արժեքների, ազգային ու մշակութային ավանդույթների պահապանը: Ամուր եւ բարեկեցիկ ընտանիքը հուսալի ապագայի երաշխիք է երկրի ու ազգի համար:

Ուստի աջակցությունը հատկապես նորաստեղծ, բազմազավակ ու անապահով ընտանիքներին, նրանց սոցիալական պաշտպանվածության բարձրացումը, դեմոգրաֆիական իրավիճակի բարելավմանն ուղղված պայմանների ստեղծումը մեր երիտասարդ պետության առանձնակի խնդիրն են: Եւս մեկ անգամ սրտանց շնորհավորում եմ այս գեղեցիկ ու ջերմ տոնի առթիվ:

Թող բոլոր ընտանիքներում տիրեն սերն ու փոխըմբռնումը, վստահությունը վաղվա օրվա հանդեպ: Մաղթում եմ առողջություն, երջանկություն, համերաշխություն եւ բարեկեցություն: 

ՀՀ ԱԺ լրատվական ծառայություն