Չար «ՀայՌուսգազարդն» ու «բարի» Կառավարությունը

«Հրապարակն» այսօրվա համարում գրել է. «Պարզվում է’ 2008-ից գազը Հայաստանի համար թանկացել է մի քանի անգամ, եթե դրան գումարենք 2005 թվականը, երթ Ռուսաստանին տվեցինք Հրազդանի ՊՇԷԿ-ի 5-րդ բլոկը, ապա, կարելի է ասել, թանկացել է մոտ 5 անգամ: Ինչպես տեղեկացնում են մեր աղբյուրները’ 2010-ից հետո տեղի ունեցած վերջին թանկացումները բնակիչները չեն զգացել, որովհետև, նախ, Մեդվեդևը Հայաստանին զիջել էր մեկ տարվա պարտքը, և ապա’ «ՀայՌուսգազարդն» իր վրա էր վերցրել այդ բեռը: Պատճառը, անշուշտ, համապետական 3 ընտրություններն էին: Սակայն նախորդ օրը ներկայացված «ՀայՌուսգազարդի» հայտը’ գազի գնի բարձրացման վերաբերյալ, դժգոհություն է առաջացրել, և, մեր տեղեկություններով, «ՀայՌուսգազարդի» դիմումից անմիջապես հետո Հանրային ծառայությունները կարգավորող մարմնին է դիմել նաև ՀՀ կառավարությունը, հայտի հիմքում ընկած գազի գինը’ 270 դոլարը 30 տոկոսով իջեցնելու հայտով: Ասել է’ եթե այսօր բնակիչներին մատակարարվող գազի գինը 132 դրամ է, «ՀայՌուսգազարդն» առաջարկում է դարձնել 221, ապա կառավարությունը պահանջել է 30 տոկոս իջեցնել այն և հարցը քննարկել այդ սահմաններում: Հիշեցնենք, որ ՀԾԿՀ-ն 90 օրում պետք է կայացնի իր որոշումը, որն էլ իր հերթին ուժի մեջ կմտնի 30 օր հետո»: