Արմեն Ջիգարխանյանը չի կարողացել մասնակցել իր թատրոնում ներկայացման պրեմիերային

Մոսկվայի դրամատիկական թատրոնի գեղարվեստական ղեկավար Արմեն Ջիգարխանյանը ուրբաթ օրը չի կարողացել ներկա գտնվել «Մոլիեր» ներկայացման պրեմիերային։ Ռիա նովոստիին այս մասին հայտնել է թատրոնի բեմադրող-ռեժիսոր Սերգեյ Վինոգրադովը։

Հայտնի դերասանը հոսպիտալացվել էր մի քանի շաբաթ առաջ։ Նրա ընկեր Արթուր Սողոմոնյանն ավելի վաղ հայտնել էր, որ արտիստն ապաքինվում է, որ այս շաբաթվա վերջին հնարավոր է դուրս գրեն նրան։

Նախօրեին թատրոնում կայացել է «Մոլիեր» ներկայացման պրեմիերան։ Ներկայացումը նվիրված է Ջիգարխանյանի ծննդյան օրվան:

«Ցավոք, Արմեն Բորիսովիչը չի գա։ Ես նրա հետ հեռախոսազրույց եմ ունեցել, նա պետք է ևս մի քանի պրոցեդուրա անցնի»,- ասել է Վինոգրադովը։

Նա նշել է, որ Ա. Ջիգարխանյանը դերասաններին հաջող աշխատանք է ցանկացել, քանի որ նրա համար շատ կարևոր է այս ներկայացումը։

Խորհրդային և ռուսական կինոյի, թատրոնի և հեռուստատեսության հայազգի դերասան ԽՍՀՄ Ժողովրդական արտիստ Արմեն Ջիգարխանյանը ծնվել է 1935 թվականի հոկտեմբերի 3-ին Երևան քաղաքում: Ընդհանուր առմամբ, Ջիգարխանյանը խաղացել է մոտ երկու հարյուր կինոդեր՝ դառնալով ամենաշատ նկարահանվող ռուսական դերասաններից մեկը։ Նրա հաշվին են դասվում բազմաբովանդակ դերեր լավագույն ռուսական և խորհրդային ռեժիսորների ֆիլմերում, տարբեր ժանրերի ժապավեններում, կատակերգական և արկածային կինոնկարներում, դրամաներում և երաժշտական ֆիլմերում։ Նրա անունը գրվել է Գինեսի ռեկորդների գիրքում՝ որպես ամենաշատ նկարահանվող ռուսական դերասան:

Աղբյուր` Panorama.am: