Դերասանական խումբը նորով փոխարինելը Խորհրդային Միությունից մնացած մեթոդ է

Համազգային թատրոնի դերասանները գործադուլ են հայտարարել դեկտեմբերի 1-ից: Նրանք պահանջում են թատրոնի տնօրենի հրաժարականը: Չեն համաձայնում նաև աշխատելու նորանշանակ գեղարվեստական ղեկավար Սուրեն Շահվերդյանի հետ: Վերջինս պատրաստ է ծայրահեղ քայլի գնալու` դերասանների նոր կազմ հավաքելով: Գործադուլն էլ, ըստ նրա, ավարտվում է դեկտեմբերի 13-ին, քանի որ դերասանները փորձերին չեն ներկայացել նոյեմբերի 13-ից:

Օպերային երգչուհի, ՀՀ Ժողովրական արտիստ ՀԱՍՄԻԿ ՊԱՊՅԱՆԸ անդրադառնալով խնդրին` նշեց, որ հեղափոխությունն արվեց նրա համար, որ մարդիկ իրենց կամքը կարողանան ազատորեն արտահայտել. «Շատ հարգելով Շահվերդյանին, այնուամենայնիվ, չեմ հասկանում, թե ինչպես է պատկերացնում աշխատել մի խմբի հետ, որն իր հետ չի ուզում համագործակցել: Հին դերասանական կազմը նորով փոխարինելը ուղղակի Խորհրդային Միությունից մնացած մեթոդ է, ցավալի է, որ պիտի կիրառվի»:

Հասմիկ Պապյանը կարծում է, որ ընդհանուր հայտարարի միշտ կարելի է գալ` հօգուտ արվեստի, և եթե այդ թատրոնին մարդիկ իրենց կյանքը, տարիներն են նվիրել ու հիմա ինչ-որ պահանջներ ունեն, կարելի է լսել. «Հարկավոր է արագ լուծումներ գտնել, չձգձգել, որ մի կողմը, կամ մյուս կողմը հոգնեն, հետո սխալ որոշումներ ընդունեն: Ի վերջո, պետք է մշակույթում հատկապես լինի դեմոկրատիա, որ օրինակ ցույց տա մնացած ոլորտներին»:

Արմինե ՍԱՐԳՍՅԱՆ

Աղբյուր՝ Irates.am: