Ով ավելի ցածր գին կասի

ԵՐԵՎԱՆ, 29 ՄԱՐՏԻ, Irates.am: Կրթության և գիտության նախարարությունը մանկապատանեկան մամուլի մրցույթ է հայտարարել: Ոլորտի հայտնի պարբերականները` «Ծիծեռնակը», «Կանչը» և «Աղբյուրը», շահողների թվում չեն, բայց խնդիրը բոլորովին էլ մրցույթում շահել-չշահելը չէ, այլ մոտեցումը, որդեգրած սկզբունքը. շահում է նա, ով ավելի ցածր գին է ներկայացնում: Ասել է թե, պարտադիր չէ, որ պարբերականը պատմություն ունենա, հեղինակային որակյալ նյութեր, լավ ձևավորում, դաստիարակչական կրթական նշանակություն և այլն:

Ցածր գինը չի՞ ենթադրում արդյոք մեկ հոգու խմբագրություն, համացանցից թխած անհեղինակ, անդեմ, անձեռագիր նյութեր, վերջին հաշվով` թերթոն: Նորաձևության, բախտագուշակների ու խոհանոցային թերթոնները, որոնցով մի շրջան ողողված էր մամուլի աշխարհը, փաստորեն կարող են պետական հովանավորություն ստանալ:

Ինչ խոսք, մանկապատանեկան մամուլն ավելի լավը դարձնելու, հասցեատիրոջը հասցնելու և բազմաթիվ այլ խնդիրներ կան, բայց մրցույթով մանկապատանեկան պարբերական տպագրելը որքա՞ն է նպատակահարմար: Կա նաև մեկ այլ հանգամանք. վերոնշյալ պարբերականները գերագույն որոշմամբ, պետական հովանավորության տակ են եղել մինչ այսօր, և ոչ ոք չեղյալ չի հայտարարել այդ որոշումը: Այսինքն` ԿԳՆ-ն անտեսու՞մ է օրենքը:

Արմինե ՍԱՐԳՍՅԱՆ