Գյուղնախարարը պատգամավորների կողմից ստացավ «համարժեք վերաբերմունք»

ԱԺ «Բարգավաճ Հայաստան» խմբակցության պատգամավոր Լյովա Խաչատրյանի համար համոզիչ չէր գյուղնախարար Սերգո Կարապետյանի ԱԺ-ում «Հայաստանի Հանրապետության 2012թ. պետական բյուջեի կատարման մասին» գյուղատնտեսության ոլորտի տարեկան հաշվետվությանը չներկայանալու պատճառաբանությունը։ Այս մասին հայտնում է Tert.am-ը:

«Գյուղնախարարի բացակայության պատճառաբանությունը՝ Արարատյան դաշտավայրում ինչ-որ ջրերի հետ զբաղվելու, համոզիչ չէ, այն դեպքում, երբ ջուրը գյուղնախարարության ոլորտից չէ, իսկ ջրային պետական կոմիտեի ներկայացուցիչն այստեղ է, մեզ հետ մասնակցում է քննարկմանը»,- ասաց պատգամավորը։

Լյովա Խաչատրյանը նշեց, որ իրենք քննարկում կատարելուց հրաժարվում են և հետաձգում մինչև հունիսի 6-ը՝ «երբ նախարարը կբարեհաճի մասնակցել քննարկմանը»։

Գյուղատնտեսության փոխնախարար Գրիգորի Բաղիյանը նշեց, որ ոչ թե նախարարը զբաղված է, այլ ինչ-որ պատվիրակության է ուղեկցում։

Նիստը վարող ԱԺ Գյուղատնտեսական և բնապահպանական հարցերի մշտական հանձնաժողովի նախագահ, ԲՀԿ պատգամավոր Մարտուն Գրիգորյանը նշեց, որ նիստը հետաձգվում է մինչև հունիսի 6-ը, իսկ փոխնախարարին հանձնարարեց. «Նախարարին փոխանցեք, որ սա պատգամավորների համարժեք վերաբերմունքն էր այսօրվա նիստին չմասնակցելու»։