Միշել Ուելբեկը Պատվավոր լեգիոնի շքանշան է ստացել

Գրող Միշել Ուելբեկը արժանացել է Ֆրանսիայի բարձրագույն պարգևին՝ Պատվավոր լեգիոնի շքանշանին: Գրողին պարգևը հանձնել է Ֆրանսիայի նախագահ Էմանուել Մակրոնը՝ հաղորդում է France Info-ն: 63-ամյա ֆրանսիացին ասպետի աստիճանի շքանշան է ստացել: Ուելբեկը Ելիսեյան պալատ է եկել երիտասարդ կնոջ և ընկերների ուղեկցությամբ: Արարողությանը ներկա են եղել Ֆրանսիայի նախկին նախագահ Նիկոլա Սարկոզին և գրող Ֆրեդերիկ Բեգբեդերը:

Բարձրագույն շքանշանը հանձնելով՝ Մակրոնն ընդգծել է, որ Միշել Ուելբեկի ստեղծագործությունը վկայում է, որ նա «ռոմանտիկ է մի աշխարհում, որը դարձել է խիստ նյութական»: Նա վստահություն է հայտնել, որ գրողի ստեղծագործությունները հոռետեսական չեն, այլ լի են լավագույն ապագայի հույսերով:
Ուելբեկն ամենաշատ թարգմանվող ֆրանսիացի գրողն է: Տարվա սկզբին թողարկված նրա վերջին «Սերոտոնին» վեպը մեծ հաջողություն է վայելում ֆրանսալեզու երկրներում: AFP-ի տվյալներով վաճառվել է գրքի 800 000 օրինակ:

Աղբյուր՝ Irates.am