Առաջին անգամ Երևանում հանդես կգա լեգենդար դաշնակահար Իվո Պոգորելիչը

ԵՐԵՎԱՆ, 7 ՄԱՅԻՍԻ, Irates.am: «Երևանյան հեռանկարներ» միջազգային երաժշտական փառատոնի հոբելյանական տարվա մեկնարկը տրվեց բրիտանական «The Swingles» լեգենդար վոկալ խմբի համերգով: Երևանում խումբը հանդես եկավ Look Back (ForWard) ծրագրով, որը հետհայացք է «Սվինգլի» հիսնամյա փառահեղ երաժշտական պատմությանը: Այն ներառում է 60-70-ականների երգիչ-երգահանների ստեղծագործությունները, բրիտանացի մերօրյա ֆավորիտների, Բախ, Սայմըն, Գարֆունկել, «Բիթլզ» և այլն:

«20-րդ հոբելյանական փառատոնը ամփոփում է անցած տարիների նվաճումները և ըստ արժանվույն կներկայացնի մեր երկիրը միջազգային ասպարեզում: Պահպանվելու է այն, ինչը քսան տարի շարունակ առանցքային է եղել՝ բարձրագույն որակ: Հայաստան կգան ուժեր, որոնք կհարստացնեն մեր երկրի մշակութային կյանքը, նոր ճանապարհներ կբացվեն մեր արվեստագետների առաջ, կստեղծվեն համագործակցության կամուրջներ, ինչպես բազմիցս եղել է: Ինչ վերաբերում է նորություններին, իհարկե, կլինեն պրեմիերաներ, հանդիպումներ աշխարհահռչակ մենակատարների ու նվագախմբերի հետ, որոնք Հայաստան են ժամանելու առաջին անգամ»,- մեզ հետ զրույցում նման կարծիք էր հայտնել փառատոնի գլխավոր մենեջեր ՍՈՆԱ ՀՈՎՀԱՆՆԻՍՅԱՆԸ:
«Երևանյան հեռանկարներ» 20-րդ միջազգային երաժշտական փառատոնի հոբելյանական տարվա հերթական համերգը տեղի կունենա մայիսի 13-ին: Առաջին անգամ Երևանում հանդես կգա լեգենդար դաշնակահար Իվո Պոգորելիչը: Փառատոնի կազմակերպիչների տեղեկացմամբ՝ Իվո Պոգորելիչը մեր օրերի դասական երաժշտության, համաշխարհային բեմի նշաձողերից է. «Նրա բացառիկ տաղանդը և վիրտուոզությունը, նորարարությունն ու արտահայտչականության մեջ ձգտումը կատարյալին` դասեցին դաշնակահարին մեր օրերի երաժշտական հսկաների շարքում: Իվո Պոգորելիչն ընդլայնել է երաժշտական մեկնաբանության հորիզոնները` սահմանելով նոր չափանիշներ համաշխարհային դաշնամուրային կատարողական արվեստում: Նրա համերգները ողջ աշխարհում համարվում են ամենասպասված մշակութային իրադարձությունները»:

Պոգորելիչը նվագել է Վիեննայի, Բեռլինի, Բոստոնի, Չիկագոյի, Լոնդոնի, Նյու Յորքի, Լոս Անջելեսի, Ցյուրիխի նվագախմբերի հետ: Նրա ձայնագրած 14 ձայներիզները շարունակում են մնալ կատալոգների առաջին տողերում` ունենալով ունկնդիրների ամենամեծ քանակը: Պոգորելիչը ձայնագրում է բացառապես «Դոյչե Գրամոֆոն» և «Սոնի» ընկերությունների համար: Նա առաջին դասական երաժիշտն էր, որի ձայնագրությունները հեռարձակվեցին տեխնոլոգիապես բարձրակարգ «Իդաջիո» հարթակով: Հայտնի են Պոգորելիչի բարեգործական և երիտասարդ երաժիշտներին աջակցելու նախաձեռնությունները, նրա անվան հետ են կապված փառատոներ Գերմանիայում և ԱՄՆ-ում, իսկ Փասադենայում անցկացվող «Իվո Պոգորելիչ» մրցույթը սահմանել է աննախադեպ` 100000 դոլարի մրցանակ` ի շահ նորահայտ տաղանդների: Իվո Պոգորելիչը առաջին դասական երաժիշտն է, որը 1988-ին արժանացել է ՅՈՒՆԵՍԿՕ-ի «Բարի կամքի դեսպանի» կոչման:

Հավելենք, որ այս տարին դաշնակահարի համար հոբելյանական է. նշվում են նրա ծննդյան 60- և ստեղծագործական գործունեության 40-ամյակները: Հոբելյանական շրջագայությունները տեղի են ունենում Եվրոպայում, Հյուսիսային և Հարավային Ամերիկաներում, Հեռավոր Արևելքում: Իվո Պոգորելիչի մենահամերգին կհաջորդի «Գրեմմի» մրցանակի արժանացած ամերիկյան «Փարքկեր» քառյակի (Parker Quartet) համերգը` մայիսի 28-ին:

Փառատոնի շրջանակում լինելու են նաև կրթական բնույթի ծրագրեր: Հունիսից վարպետության դասեր են նախատեսվում Բյուրականի արվեստի ակադեմիայում: Եկող տարի կմեկնարկի ամառային դպրոցը: Տաղանդաշատ ու հեռանկարային երիտասարդ երաժիշտներին դասավանդելու համար հրավիրվելու են երաժշտական աշխարհի առաջատար մասնագետներ: Երաժշտական այս կրթօջախը կոչված է միջազգային կարգի մենակատարներ պատրաստելու, ինչի համար փառատոնի կազմակերպիչները ջանք չեն խնայում:

Արմինե ՍԱՐԳՍՅԱՆ