Գուրգեն Մահարի․ Օրոր օրոր
22/05/2019 22:41
Նմանատիպ
Արևավոր, արևավոր իմ սերերին,
Իմ հույզերին արևավոր ու նոր, ու նոր
Իմ լույսերին ու լուսավոր իմ հույսերին,
Ընկուզենուն լայնասաղարթ, օրոր, օրոր,
Օրոր, օրոր:
Օրոր մարգին, արտույտներին, ծառին, ձորին,
Կածաններին իմ մենավոր, կանաչ բարդուն,
Օրոր, քնքուշ իմ աքասի, օրոր, մորի,
Օրոր սարին, հանդին, արտին, օրոր մարդուն,
Օրոր, օրոր:
Շամբուտներին ու ամպերին մութ ու անձրև,
Անտառներին, արոտներին քամուն, քարին,
Օրոր սրտին իմ՝ արտի պես անձրևածեծ,
Օրոր սրտին՝ վարդերի պես արնակարմիր,
Օրոր, օրոր:
Օրոր նրանց՝ արևային երգիչներին,
Որոնք մի օր երգ երգեցին ու անց կացան,
Կարդացողին օրոր, սրտոտ ու մտերիմ,
Կարդացողին, որ եղել է, հիմա չկա,
Օրոր, օրոր:
