Սիրիահայերի թաղամասի կառուցման համար կազմակերպվում է նկարների ցուցահանդես-վաճառք

Հունիսի 7-ին ՀՀ սփյուռքի նախարար Հրանուշ Հակոբյանի մասնակցությամբ կայացավ սիրիահայերի թաղամասի կառուցման նպատակով հայ նկարիչների և լիբանանահայ արվեստաբան Մովսես Հերկելյանի նվիրաբերած նկարների հավաքածուի ցուցահանդես-վաճառքի նախնական ցուցադրությունը: Այս մասին տեղեկացնում են ՀՀ Սթյուռքի նախարարության մամուլի ծառայությունից: 

Հունիսի 17-22-ը, ՀՀ սփյուռքի նախարարության և Մարսելի «Terre d’Armenie» մշակութային կազմակերպության նախաձեռնությամբ, Ֆրանսիայի Մարսել քաղաքում կիրականացվի «Ֆրանս-հայկական գերազանցության շաբաթ», որի շրջանակում տեղի կունենա այդ հավաքածուի ցուցահանդես-վաճառքը: Ստացված ողջ հասույթը կտրամադրվի սիրիահայերի համար թաղամասի կառուցման աշխատանքներին:

Նկարիչների նվիրատվության այս նախադեպով ՀՀ սփյուռքի նախարարությունը սկսում է ծանր կացության մեջ հայտնված մեր հայրենակիցներին՝ սիրիահայերին օգնելու նոր շարժում, որը նպատակ ունի աջակցելու Աշտարակ քաղաքում «Նոր Հալեպ» թաղամասի կառուցմանը:

Նկարների ցուցադրության բացումը տեղի ունեցավ «Էրեբունի պլազա» բիզնես-կենտրոնի նախասրահում՝ նկարիչ Վահրամ Հարությանի ցուցասրահում, որին մասնակցեցին նվիրատու նկարիչներից Վահրամ Դավթյանը, Վահան Ռումելյանը, Գևորգ Եղիազարյանը, Նաիրա Աղախանյանը:

Շնորհակալություն հայտնելով հայ նկարիչներին և սփյուռքահայ արվեստաբան Մովսես Հերկելյանին այս կարևոր նախաձեռնության համար՝ ՀՀ սփյուռքի նախարար Հրանուշ Հակոբյանը նշեց, որ հայազգի նկարիչներն այս քայլով իրենց ուրույն ներդրումը կունենան սիրիահայ մեր հայրենակիցների համար Հայրենիքում պետության կողմից իրականացվող բնակարանաշինության հույժ կարևոր գործին:

Հայ գեղանկարչական արվեստը միջազգային հարթակներում ներկայացնելու, 28 միջազգային ցուցահանդեսներով ոլորտում թարմություն ներմուծելու, և Սփյուռքի տարբեր համայնքներում հայկական արվեստը տարածելու և ճանաչելի դարձնելու համար նախարար Հրանուշ Հակոբյանը ՀՀ սփյուռքի նախարարության «Արշիլ Գորկի» մեդալով պարգևատրեց շարժմանը «Կեսգիշերային խաղ» կտավը նվիրաբերած Վահրամ Դավթանին:

«Անսահման շնորհակալ եմ այս ազգասիրական, բարեսիրական գործունեության համար: Համոզված եմ, որ Ձեր քայլը և մասնակցությունը օրինակ կծառայի մեր արվեստի մյուս ճյուղերի ներկայացուցիչների, մտավորականության և մասնավորապես գործարարների համար՝ իրենց լուման ներդնելու սիրիահայ մեր հայրենակիցներին աջակցելու կարևոր գործին», – եզրափակեց ՀՀ սփյուռքի նախարարը:

Իր հերթին շնորհակալություն հայտնելով ՀՀ սփյուռքի նախարարությանը նման նախաձեռնությամբ հանդես գալու համար շարժմանը միացած և ցուցահանդես-վաճառքին 4 նկար նվիրաբերած Նաիրա Աղախանյանը նշեց. «Մշտապես ցանկացել եմ ինչ-որ կերպ ներդրում ունենալ սիրիահայերին օգնելու գործին, սակայն չեմ կողմնորոշվել, թե ինչպես: Այս շարժումը ե՛ւ Մարսելում սեփական նկարներով ներկայանալու, ե՛ւ միաժամանակ նկարներիս վաճառքից ստացված հասույթը սիրիահայությանը օգնելու ազնիվ և ազգանվեր գործին տրամադրելու լավ առիթ է»: