«Ֆիլմը դիտելուց հետո ձկնորսներն ասացին, որ իրենց աշխատանքը շատ գեղեցիկ է»

ԵՐԵՎԱՆ, 4 ՀՈՒՆԻՍԻ, Irates.am: Սևաստոպոլում կայացած «Հաղթեցինք միասին» միջազգային 15-րդ կինոփառատոնում Սևանի ավազանի մասին պատմող ԱՐԹՈՒՐ ՍԱՀԱԿՅԱՆԻ «Քամու հետ» ֆիլմն արժանացել է «Լավագույն վավերագրական ֆիլմ» մրցանակին: Վավերագրական ֆիլմերի մրցույթին մասնակցել են երիտասարդ ռեժիսորներ տարբեր երկրների 12 կինոդպրոցներից (Ռուսաստան, Ղրղզստան, Բելառուս, Լիտվա, Սլովակիա, Ղազախստան, Իսպանիա): Արթուր Սահակյանի ֆիլմը ներկայացրել է Երևանի թատրոնի և կինոյի պետական ինստիտուտը: «Քամու հետ»-ը ռեժիսորի դիպլոմային աշխատանքն է, արժանացել է հանրապետության նախագահի 2017 թ. երիտասարդական մրցանակին, լավագույն վավերագրական ֆիլմ է ճանաչվել «Անահիտ» 2-րդ մրցանակաբաշխության ժամանակ, անցյալ տարի ներկայացվել է «Ոսկե ծիրան» միջազգային փառատոնի «Հայկական համայնապատկեր» ծրագրում՝ արժանանալով «Լավագույն դեբյուտ» մրցանակին: Մոտ օրերս ֆիլմը կցուցադրվի «Մեկ կադր» փառատոնի շրջանակում:

– Արթուր, ի՞նչ տպավորություններով ես վերադարձել Սևաստոպոլում կայացած փառատոնից:

– Առաջին անգամ էի մասնակցում միջազգային փառատոնի: Մրցանակի արժանանալը, օտարերկրյա կինոգործիչների հետ ծանոթությունը, նրանց կարծիքները լսելը, համագործակցության առաջարկները, այդ ամենը հետաքրքիր ու կարևոր էին ինձ համար, չհաշված Սևաստոպոլի գինին:

– Օտարերկյա երիտասարդ կինոգործիչների ուշադրության կենտրոնում ո՞ր թեմաներն են:

– Հիմնականում բարձրացնում են սոցիալական թեմաներ, հետաքրքիր է, որ երիտասարդները նկարահանում են երիտասարդների մասին ֆիլմեր: Կարծում եմ՝ դա ավելի անկեղծ է ստացվում:

– Ինքդ Սևանի մասին ես ֆիլմ նկարահանել, փառատոնի ժամանակ էլ նշեցիր, որ քեզ հարազատ է այդ թեման, մեծացել ես այդ վայրերում: Կարծում ես՝ ֆիլմիդ հաջողության գրավականը հենց դա՞ է:

– Ինձ համար մի քիչ բարդ է այդ մասին խոսելը: Երևի հաջողության գրավականն այն մարդիկ են, որ անկեղծորեն ներկայացրել են իրենց խնդիրներն ու առօրյան: Ֆիլմը դիտելուց հետո ձկնորսներն ասացին, որ իրենց աշխատանքը շատ գեղեցիկ է: Կարծում եմ՝ այդ բարդ ու վտանգավոր աշխատանքը նրանք սիրով են անում, և այդ սերն ու գեղեցկությունը երևում են ֆիլմում:

– Ֆիլմիդ սկզբում նշվում է, որ Սևանա լճում տարեկան միջին հաշվով 10 ձկնորս է խեղդվում: Ֆիլմը նաև տարածաշրջանի միակ կին ձկնորսի մասին է: Հանձնախումբը քո ներկայացրած շեշտադրումներից հատկապես ի՞նչն է կարևորել:

– Մամուլի ասուլիսի ժամանակ հանձնաժողովի նախագահն ասաց, որ այս տարի մրցանակ կստանա մի ֆիլմ, որը նորություն է կինոմտածողության և բովանդակային առումով: Իսկ մրցանակաբաշխությունից հետո, անմիջական զրույցների ժամանակ հասկացա, որ նրանք սիրահարված էին Սևանի գեղեցկությանը:

– Կարելի՞ է ասել, որ ոչ թե սոցիալական թեման, այլ գեղեցիկ պատմությունն է գրավել հանձնախմբին:

– Այո, պոետիկ ռեալիզմը:

– Մրցութային ծրագրերում կայի՞ն քաղաքական շեշտադրումներով ֆիլմեր:

-Փառատոնի շրջանակում անցկացվեց պատերազմական թեմաներով ֆիլմերի մրցույթ: Այո, ընդհանուր առմամբ, կային ֆիլմեր, որ ուղարկվել էին որոշակի ակնկալիքով, ուղերձով, բայց կինոդպրոցների մրցույթում քաղաքական շեշտադրումներով աշխատանքներ չնկատեցի:

– Հաջորդ ֆիլմդ ինչի՞ մասին է լինելու: Մեր նախորդ զրույցի ժամանակ ասացիր, որ եռապատում ես ստեղծելու, բայց հաջորդ երկու աշխատանքները ոչ թե Սևանին են վերաբերելու, այլ տարածաշրջանին: Իսկ վաղամեռիկ երգչուհի Էլվինա Մակարյանի մասին ֆիլմդ ո՞ր փուլում է:

– Երկու նախագծերն էլ ուժի մեջ են, ավելացել են մի քանիսը: Անկեղծ ասած, Էլվինա Մակարյանի դեպքում նյութերի պակաս կա, սպասում եմ, կհամալրեմ դրանք, կավարտեմ և կսկսեմ մոնտաժել ֆիլմը: Նոր անիմացիոն շարք եմ սկսել 5-րդ ալիքով՝ «Մեզնից մեկը» վերնագրով. անդրադառնալու եմ Չարենցին, Մինասին, Տերտերյանին, մոտ 10-20 հայ մտավորականի:

– Ժամանակակից գրողի աշխատանքը էկրանավորելու մասին մտածե՞լ ես:

– Ներկայումս գրող, սցենարիստ Հովիկ Աֆյանի հետ աշխատում ենք կարճամետրաժ խաղարկային ֆիլմի սցենարի վրա: Սցենարական աշխատանքների փուլն ավարտելուց հետո կանցնեմ նկարահանումներին:

– Հովիկ Աֆյանի «Միս ուտողները» պատմվածքների ժողովածուի հետ ֆիլմը կապ ունի՞:

– Ոչ, նոր աշխատանք է:

Զրույցը՝ Արմինե ՍԱՐԳՍՅԱՆԻ

 

Հետևեք մեզ նաև Telegram-ում