Ղազինյան. Ո՞վ է պատասխանատու Փաշինյանի առողջության համար

ԵՐԵՎԱՆ, 18 ՀՈՒԼԻՍԻ, Facebook: «Մեկ Հայաստան» կուսակցության հիմնադիր, իրավաբան Արթուր Ղազինյանը խոսքեր չի գտնում՝ արձագանքելու վարչապետ Նիկոլ Փաշինյանի՝ «Ազատություն» ռադիոկայանին տված հարցազրույցում հնչեցրած հայտարարություններին։

«Երեկվանից մտածում եմ ինչպես արձագանքել Նիկոլ Փաշինյանի դատական համակարգին ուղղված ոչ կոռեկտ և վիրավորական բնույթի որակումներին։

Ուղղակի խոսքեր չեմ գտնում։ Ինչպե՞ս կարող է պետության ղեկավարն իր դատավորներին վիրավորել, օգտագործել մարդու նկատմամբ անթույլատրելի այնպիսի բառեր, ինչպիսիք են «անտեր, փեդով գլխին խփել, դռների տակ վնգստալ»։

Ինչ որ մեկդ այս մարդուն փողոցից բերեք տուն, տաք թեյ տվեք, բացեք 11-րդ դասարանի «հասարակագիտություն» առարկայի դասագիրքը և բարձրաձայն կարդացեք, որ մարդու արժանապատվությունն անօտարելի արժեք է, չի կարելի վիրավորել մարդու ինքնասիրությունը, բացատրեք, որ գոյություն ունի իշխանությունների տարանջատման սկզբունք, որտեղ գործադիր և դատական իշխանությունները հավասարազոր են, գործադիրի ղեկավարը ԻՐԱՎՈՒՆՔ չունի միջամտել, մասնավորապես որակել, գնահատել և վիճարկել դատական իշխանության գործողությունները։

Ինչ որ մեկդ իրան ասեք, որ եթե զգում է, որ իր հոգեվիճակը չի բավարարում պետության ղեկավարի համար սահմանված հավասարակշռության, զսպվածության, կոռեկտության և հաշվետվողականության նվազագույն պահանջներին, ապա ավելի ճիշտ կլինի լռել, ուղղակի լռել, կամ ծայրահեղ դեպքում գրավոր շարադրել իր մտքերը։

Ո՞վ է պատասխանատու Փաշինյանի առողջության համար։ Խնդրում եմ առավել զգոն լինել, նա այժմ զբաղեցնում է խիստ կարևոր պաշտոն, տիրապետում է կարևորագույն և հզոր լծակների, որոնց չհաշվարկված կիրառումը կարող է հանգեցնել անկանխատեսելի հետևանքների։

Մեկ էլ խնդրում եմ հուզական բնույթի նամակներ մի գրեք իրեն, ցնցվում է…»,- գրել է Ղազինյանն իր էջում։