Ձայնագրվում են դասականների ստեղծագործությունները

ԵՐԵՎԱՆ, 19 ՀՈՒԼԻՍԻ, Irates.am: «Գրեմմիի» բազմակի մրցանակակիր, երաժշտական պրոդյուսեր Քրիստոֆեր Ալդերը Հայաստանի պետական սիմֆոնիկ նվագախմբի հետ ձայնագրում է Ավետ Տերտերյանի 5-րդ և 7-րդ, ինչպես նաև Ջոն Տեր-Թադևոսյանի 2-րդ սիմֆոնիաները։

Ձայնագրման մտահղացումը ծագել է հայ կոմպոզիտորների ստեղծագործություններին ծանոթանալուց հետո։ Նա նվագախմբից պահանջել է մեծ քանակությամբ տեղեկություն կոմպոզիտորների, նրանց ստեղծագործությունների, պարտիտուրաների մասին։ Նախագծի նպատակն է Հայաստանի սահմաններից դուրս ներկայացնել այնպիսի գործեր, որոնք կարող են հետաքրքրել օտարերկրյա հանդիսատեսին։ Համագործակցությունը շարունակություն կունենա, թե ոչ, կախված է նախագծի հաջողությունից։ Նշենք, որ վերջին ամիսներին ՀՊՍՆ գեղարվեստական ղեկավար և գլխավոր դիրիժոր Սերգեյ Սմբատյանն ու Քրիստոֆեր Ալդերը Լոնդոնի սիմֆոնիկ նվագախմբի հետ համատեղ ձայնագրություններ են թողարկել։ Ի թիվս այլ ստեղծագործությունների, ձայնագրել են Արամ Խաչատրյանի և Էդվարդ Միրզոյանի ստեղծագործություններից։

Քրիստոֆեր Ալդերի հայաստանյան այցն ու հայկական սիմֆոնիաների ձայնագրությունները հնարավոր են դարձել ՀՀ ԿԳՄՍ նախարարության և «Իմ քայլը» հիմնադրամի աջակցությամբ։

Արմինե ՍԱՐԳՍՅԱՆ