Ախթալայի եկեղեցու որմնանկարների վերականգնման աշխատանքները կմեկնարկեն հաջորդ տարի

ԵՐԵՎԱՆ, 1 ՕԳՈՍՏՈՍԻ, Irates.am: Ախթալայի Սուրբ Մարիամ Աստվածածին եկեղեցու պատմական որմնանկարների պահպանումն ու վերականգնումը կարծես իրականություն է դառնում: «Իրատեսին» վանական համալիրի սպասավոր տեր Հեթում Թարվերդյանը հայտնեց, որ ըստ երևույթին արդեն հաջորդ տարի կսկսվեն ավելի քան 900 քմ որմնանկարների վերականգնման աշխատանքները: «Որմնանկարների պահպանության անհետաձգելիության ու խիստ անհրաժեշտության մասին երկար ժամանակ բարձրաձայնելուց ու ահազանգելուց հետո կարծես սայլը տեղից շարժվում է: Բարերարի հետ այս պահին բանակցությունների փուլում ենք: Նա պատրաստակամություն է հայտնել հոգալու ծախսերը, ինչը, ի դեպ, բավական մեծ գումարներ է ենթադրում: Ներկայացրել ենք նախագիծն ու նախահաշիվը»,- ասաց նա:
Նշենք, որ 800-ամյա որմնանկարները բացառիկ ու եզակի են համաշխարհային որմնանկարչության մեջ:

Սևակ ՎԱՐԴՈՒՄՅԱՆ