Կառավարության կողմից առաջարկվող՝ ծնելիությունը բարձրացնելու լուծումներից հետո մի շարք հարցեր են առաջանում

ԵՐԵՎԱՆ, 24 ՍԵՊՏԵՄԲԵՐԻ, Facebook: Ասե՞մ, թե՞ չասեմ շարքից.

Կառավարությունը որոշել է խրախուսել ծնելիությունը՝ 6 անգամ բարձրացնելով առաջին երեխայի ծննդյան միանվագ նպաստը՝ 50 հազար դրամից դարձնելով 300 հազար դրամ և 2 անգամ բարձրացնելով երկրորդ երեխայի ծննդյան միանվագ նպաստը՝ 150 հազար դրամից դարձնելով 300 հազար դրամ։

Իհարկե գովելի է, որ փորձ է արվում լուծում գտնել ծնելիության անկման խնդրին: Համաձայն պաշտոնական վիճակագրության՝ Հայաստանում 2018-ին ծնվել է 36502 երեխա, 2017-ին՝ 37700, 2016-ին՝ 40592, իսկ 2015-ին՝ 41763:

Ունենք շարունակական անկման միտում, ինչը կանխելու ուղղությամբ անհրաժեշտ են մտածված, հետազոտված և երկարաժամկետ ռազմավարական գործողություններ:

Առաջարկվող լուծումներից հետո մի շարք հարցեր են առաջանում՝

առկա է արդյոք հետազոտություն, թե զույգերի քանի տոկոսն են առաջին երեխայի պլանավորումը հետաձգում մինիմալ կարիքները հոգալու համար անհրաժեշտ միջոցներ չունենալու պատճառով և ինչ արդյունք է ապահովվելու (ինչ տոկոսի փոփոխություններ են ակնկալվում) 50-300 հազար դարձնելու պարագայում:

Հայաստանում վերջին տարվա ընթացքում ծնվել է մոտ 15000 առաջին երեխա, այս քայլով ուղղակի բյուջեից ծախսվելու է 15000*250000=3750000000 դրամ ավել գումար:

Տարեկան ծնվում է ավելի քան 13000 երկրորդ երեխա, այսինքն պլանավորվում է հատկացնել ևս 13000*150000=195000000 դրամ ավել գումար:

Հաշվի առնելով այն հանգամանքը, որ ծրագիրը պետք է խրախուսի ծնելիությունը՝ ծրագրի միայն 2 կետերի իրականացման համար անհրաժեշտ կլինի տարեկան 6մլրդ դրամից ավելի գումար:

Իհարկե խրախուսելը լավ է, բայց սա այնպիսի ծավալի ծախս է, որն իրականացնելիս պետք է ունենալ ազդեցության գնահատման արդյունավետության ցուցիչներ:

Որտե՞ղ է մեր հիմնական խնդիրը, ի՞նչ խնդիր ենք լուծում, ի՞նչ աճ ենք ակնկալում և այլն:

Հ.Գ. 6մլրդն այն գումարն է, որով կարելի է ռեալ, սոցիալական, արդյունավետ ծրագրեր իրականացնել՝ սկսած բնակարանաշինությունից…

Բաբկեն ՊԻՊՈՅԱՆ