Հրայր Թովմասյանի աղջիկներին հիմնականում հարցրել են սեփականության իրավունքով պատկանող գույքից. փաստաբան (Տեսանյութ)

ԵՐԵՎԱՆ, 18 ՀՈԿՏԵՄԲԵՐԻ, Aysor.am: ԱԱԾ-ում Հրայր Թովմասյանի աղջիկներին հիմնականում հարցրել են սեփականության իրավունքով պատկանող գույքից։

«Որոնք, ըստ էության, շատ չեն», – լրագրողներ հետ զրույցում ասաց աղջիկների փաստաբան Հայկ Սարգսյանը։

Նա նշեց, որ ավագ աղջկա դեպքում համապատասխան գույքն ավտոտնակ է Կենտրոն վարչական շրջանում, որը նա 2016 թվականին նվիրատվությամբ ստացել է մորաքրոջ աղջկանից։

«Կրտսեր աղջկա միակ գույքը վերաբերում է 2014 թվականի արտադրության «Nissan-sentra» ավտոմեքենային, որը նա կրկին 2016 թվականին ստացել է մորաքրոջ աղջկանից՝ որպես նվեր։ Նվերի ստացման պատճառը կայանում է նրանում, որ մորաքրոջ աղջիկը մշտական բնակության է մեկնել ԱՄՆ և որոշել է գույքը նվիրել իր երկու քույրերին», – ասաց փաստաբանը։

Հայկ Սարգսյանն ասաց, որ հարց է եղել նաև կարճ ժամանակահատվածում ավագ դստերը պատկանող «Nissan patrol» մեքենայի վերաբերյալ, որը վերջինս ապրիլյան պատերազմի օրերին նվիրել է Արցախի պաշտպանության բանակին։

Նա ասաց, որ Հրայր Թովմասյանի գործունեության հետ կապված հորն ու աղջիկներին որևէ հարց չի տրվել։