Անատոլի Պապյան. «Ճանապարհ»

ԵՐԵՎԱՆ, 20 ՀՈՒՆՎԱՐԻ, Irates.am: Հունվարի 25-ին, ժամը 15:00-ին Նկարիչների միությունում տեղի կունենա Անատոլի Պապյանի «Ճանապարհ» խորագիրը կրող անհատական ցուցահանդեսի բացումը։ Ցուցահանդեսն իր ձևաչափով յուրահատուկ է, քանի որ ներկայացված կլինեն ոչ միայն վարպետի ճանաչված աշխատանքներն, այլև մի ամբողջ ստեղծագործական ճանապարհ՝ տղայից, ով սիրում էր նկարել մինչև ՀՀ Ժողովրդական նկարիչ, պրոֆեսոր Անատոլի Պապյան։

Գեղանկարչի դիմանկարներն ու կոմպոզիցիաներն աչքի են ընկնում անմիջականությամբ, ժամանակի (1950-60-ական թվականներ) անհատի ապրումները, նաև հասարակական ու գեղագիտական ըմբռնումներն արտահայտելու շեշտված միտումով։ Գունանկարներին բնորոշ են կուռ կառուցվածքը, զուսպ միջոցներով մեծ արտահայտչականության հասնելու վարպետությունը։

Անատոլի Պապյանը անհատական ցուցահանդեսներ է ունեցել Երևանում, Փասադենայում։ Գործերից պահվում են Հայաստանի ազգային պատկերասրահում, Մոսկվայի Արևելքի ժողովուրդների արվեստի պետական թանգարանում և այլուր։