Լիտվան գլխավորել է Եվրամիության Խորհուրդը

Առաջիկա կես տարում Եվրամիության Խորհրդում նախագահելու է Լիտվան: Հուլիսի 1-ին այդ լիազորությունները Իռլանդիայից անցել են նրան, հաղորդում է «Արմենպրես»-ը:

«Այս պատվավոր առաքելությունը Լիտվան առաջինն է ստանձնել Բալթյան երկրներից»,- ԻՏԱՌ-ՏԱՍՍ-ի հետ զրուցելիս նշել է Սեյմի (խորհրդարանի) եվրոպական գործեի կոմիտեի նախագահ, խորհրդարանի փոխխոսնակ Գեդիմինաս Կիրկիլասը:

Նրա խոսքով՝ Վիլնյուսը, որպես իր նախագահության գերակայություններ, առաջադրել է «Արեւելյան գործընկերություն» ծրագրին, ինչպես նաեւ Բալթիկ ծովի տարածաշրջանի համար Եվրամիության ռազմավարությանը նոր դինամիկա հաղորդելը, էներգետիկական անվտանգության հարցերի լուծումը եւ Եվրամիության արտաքին սահմանների պահպանության ամրապնդումը:

Իր նախագահության ըթնացքում Լիտվան շուրջ երեք հազար տարբեր միջոցառումներ ու հանդիպումներ կանցկացնի Բրյուսելում եւ Լյուքսեմբուրգում: Լիտվայում կկայանա շուրջ 180 միջոցառում, այդ թվում՝ 16 հանդիպում նախարարների մակարդակով: Նոյեմբերին Վիլնյուսում նախատեսված է «Արեւելյան գործընկերություն» ծրագրի մասնակից պետությունների ղեկավարների հանդիպումը:

Լիտվայի նախագահության բյուջեն կազմում է 214 մլն լիտ (62 մլն եվրո):