Հույս ունեն, որ այդ ժամանակ իշխանություն չեն լինի ու կպրծնեն ծառատունկի խնդրից. Վահագն Վարագյան

ԵՐԵՎԱՆ, 20 ԱՊՐԻԼԻ, Facebook: Օրեր շարունակ սոցիալական ցանցերում քննարկվում է Երևանում ծառերի այն խորը էտը, որ կատարվում է ապրիլ ամսին: Նույնիսկ համաշխարհային պանդեմիայի օրերին, երբ մասնագետներից շատերը կարծիք են հայտնում, թե սա բնության պատասխանն է մարդու ավերիչ գործունեությանը, Երևանի քաղաքային իշխանություններն այդպես էլ չհասկացան, որ գոնե այս տարի կարելի էր այդքան խորը էտ չանել կամ նույնիսկ ընդհանրապես չանել: Որովհետև իրենց առաջնային խնդիրը կանաչապատումն ու կանաչ գոտիների ավելացումն է, ոչ թե եղածը կասկածելի մեթոդաբանությամբ խուզելը:

Կհիշեք երևի, ամիսներ առաջ ժողվարչապետը ավետեց Հայաստանում 10 միլիոն ծառ տնկելու կամ ցանելու անիրականանալի ծրագրի մասին, (այդպես էլ չհասկացանք վերջը տնկելու՞ էին, թե՞ ցանելու), իսկ պանդեմիան կարծես թե առիթ պետք է դառնար, որ արագացնեին այդ ծրագիրը: Եղավ հակառակը. ծրագիրը տեղափոխեցին հաջորդ տարի՝ երևի թե հույս ունենալով, որ գոնե այդ ժամանակ իշխանություն չեն լինի ու կպրծնեն այդ խնդրից:

Հիմա անրադառնանք Երևանին. տակավին վերջերս պարգևավճար ստացած քաղաքային իշխանությունները ճիշտ կանեն էտի փոխարեն կանաչապատման աշխատակիցների հետ լծվեն ծառատունկեր կազմակերպելուն, քանի որ սա եզակի հնարավորություն է քաղաքում կանաչ գոտիների ստեղծման ու Նորքի և «Մոնումենտի» բարձունքներում անտառների վերականգնման համար: Կարգին Հայկոն կամ պետք է հասկանա, որ իրական գործ պետք է անի, այլ ոչ թե կանաչ տարածքներն ավելի վնասելու ձևով աշխատանքի իմիտացիա ստեղծի, կամ էլ պետք է պատրաստվի, որ Երևանի իրական բնապահպանական խնդիրները վերջակետ են դնելու քաղաքապետի պաշտոնում իր անփառունակ գործունեությանը:

Վահագն ՎԱՐԱԳՅԱՆ