Միքայել Մինասյանին առաջադրված մեղադրանքն իր աբսուրդության աստիճանով արժանի է «Գրան Պրի» մրցանակի. պաշտպան
Նմանատիպ
ԵՐԵՎԱՆ, 4 ՄԱՅԻՍԻ, Times.am: Սուրբ Աթոռում ՀՀ նախկին դեսպան Միքայել Մինասյանի պաշտպաններից Ամրամ Մակինյանը ֆեյսբուքյան իր էջում գրառում է կատարել՝ անդրադառնալով նրան առաջադրված մեղադրանքին:
«Վերջին երկու տարում ականատես եմ եղել բազմաթիվ ապօրինի մեղադրանքների, դատավարական կոպիտ և էական խախտումների, սակայն այդ շարքում Միքայել Մինասյանին առաջադրված մեղադրանքն իր աբսուրդության աստիճանով արժանի է «Գրան Պրի» մրցանակի, իսկ իրականացվող նախաքննությունն իր միակողմանի և ակնհայտ ոչ օբյեկտիվ դրսևորումներով՝ նորանոր ռեկորդներ է գրանցում»։
Հիշեցնենք, որ ՊԵԿ-ը հաղորդագրություն էր տարածել՝ հայտնելով, որ 2020-ի մարտ և ապրիլ ամիսներին Միքայել Մինասյանի նկատմամբ քրեական գործեր են հարուցվել հայտարարագրման ենթակա տվյալներ թաքցնելու և ապօրինի հարստացման հոդվածներով, սակայն նրա պաշտպանները բազմիցս նշել են, որ մեղադրանքը քաղաքական պատվեր է:
Նրանք նշում են, որ իրականում տեղի է ունեցել տեխնիկական վրիպակ, բանկային մի հաշվեհամարից մեկ այլ հաշվեհամարի գումար փոխանցելը «փողերի լվացում» որակել չի կարելի:
Հետևեք մեզ նաև Telegram-ում