Կամերային կենտրոնի 2020-2021 համերգաշրջանի մեկնարկը կազդարարվի ինքնատիպ բացօթյա համերգով

ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ։ Կամերային երաժշտության ազգային կենտրոնի 2020-2021 թթ․ համերգաշրջանի մեկնարկը կազդարարվի ինքնատիպ բացօթյա համերգով։ Սեպտեմբերի 5-ին բոլորովին նոր հարթակում՝ Կոմիտասի անվան կամերային երաժշտության տան այգում, համերգով հանդես կգան Երևանի պետական կամերային երգչախումբը (գեղարվեստական ղեկավար և խմբավար՝ Հարություն Թոփիկյան) և Հնագույն երաժշտության «Տաղարան» համույթը (գեղարվեստական ղեկավար և դիրիժոր՝ Սեդրակ Երկանյան):
«Արմենպրես»-ի հաղորդմամբ՝ համերգի ծրագրում կհնչի հայկական ավանդական երաժշտություն, Կոմիտաս, Էդգար Հովհաննիսյան։ Համերգին հնարավորություն կունենա ներկա գտնվելու սահմանափակ թվով հանդիսատես՝ պարետատան սահմանած կանոններին համապատասխան։ Միջոցառման ընթացքում կպահպանվեն հակահամաճարակային բոլոր կանոնները։

Կամերային երաժշտության ազգային կենտրոնն ու իր 5 երաժշտախմբերը, չնայած կորոնավիրուսով պայմանավորված դժվարություններին, շարունակել են ակտիվ գործունեություն ծավալել առցանց հարթակներում, ներկայացնելով կրթական ծրագրեր, լավագույն համերգների և ելույթների տեսագրություններ, իրականացրել այլ նախաձեռնություններ։ ԿԵԱԿ երաժշտախմբերը փոքր կազմերով հանդես են եկել Մայրության և գեղեցկության օրվան նվիրված, Հայոց ցեղասպանության 105-ամյա տարելիցին նվիրված «Ոգեկոչման գիշեր», «Շնորհակալություն մեր հերոս բուժաշխատողներին» բուժաշխատողի օրվան նվիրված համերգներին: