Մուշի քաղաքապետարանը սկսել է հայկական տները քանդելու գործընթացը

Թուրքիայի Մուշի քաղաքապետարանը, անդրադառնալով հայական տները քանդելու մասին վերջին շրջանում արդիական դարձած խոսակցություններին, հայտարարություն է արել, որում հերթական անգամ հերքել է տները հայերին պատկանելու մասին տեղեկությունը: Ինչպես հաղորդում է «Արմենպրես»-ը, այս մասին տեղեկացնում է թուրքական Haberler.com-ը: Լրատվամիջոցը տեղադրել է տեսանյութ, որտեղ երևում են Քալե թաղամասի կիսաքանդ տները:

Թուրքիայի կառավարության բնակելի շենքերի հարցերով զբաղվող վարչությունը (TOKİ) «քաղաքային վերակառուցում» նախագծի շրջանակներում նախատեսում է Մուշի Քալե թաղամասի պատմական հայկական տների փոխարեն կառուցել 864 բնակելի տներ և 107 գրասենյակներ: Շուրջ 60 հազար քառակուսի մետր զբաղեցնող տարածքում վերակառուցումներ իրականացնելու վերաբերյալ վարչությունը համաձայնության է եկել բնակիչների 85 տոկոսի հետ:

Մուշի Քալե թաղամասում գտնվող տների ներկայիս բնակիչներից շատերը հրաժարվում են վարչության տրամադրած փողերի դիմաց թողնել և հեռանալ: Սակայն, ի պատասխան նրանց բողոքների’ TOKİ-ի ներկայացուցիչները հայտարարել են, որ ամեն դեպքում քանդելու են տները, և եթե բնակիչները կամավոր չհեռանան, ապա նրանց իրերն էլ կմնան փլատակների տակ:

Քալե թաղամասի բնակիչ Էրջան Չեթեն հայտնել է, որ իրենք չեն ցանկանում լքել տները, որոնք ունեն 148 տարվա պատմություն: Խոսելով այն մասին, որ բազմիցս դիմել է համապատասխան մարմիններին տունը չքանդելու համար’ Չեթեն ասել է. «Նրանց պատմեցի, որ տունս պատմական արժեք է և չեմ ցանկանում, որ այն քանդվի: TOKİ-ն և քաղաքապետարանը մեղքը մեկը մյուսի վրա են գցում: Նահանգապետարան էլ դիմեցի, սակայն ասացին, որ չեն հրաժարվի իրենց որոշումից: Տունս միլիոններ արժե, սակայն դրա քանդվելու դիմաց TOKİ-ն ընդամենը մի քանի սենյականոց բնակարան է տալու»: Բնակիչը պատմել է, որ քա ղաքապետարանի աշխատակիցները սպառնալիքներ են հնչեցրել նրա նկատմամբ տունը չազատելու համար: Նա մտավախություն է հայտնել, որ ամեն րոպե կարող են բռնությամբ քանդել հարյուրամյա պատմություն ունեցող տունը:

Մուշի պատմական հայկական տները քանդելու դեմ Թուրքիայում էլեկտրոնային ստորագրահավաք է սկսվել, որի նախաձեռնողները կոչ են արել միանալ և արգելել հայկական պատմական վերջին հետքերի ոչնչացումը Մուշում: «Հայերը, հույները, ասորիները համակարգված կերպով կոտորածի են ենթարկվում: 1915 թվականի ցեղասպանությամբ սկսված գործընթացն այսօր շարունակվում է որպես մշակութային և տնտեսական ցեղասպանություն: Սրա նպատակն առավելագույն շահույթ ստանալն է, ինչպես նաև հավաքական հիշողությունը ոչնչացնելը: Մշակույթ ոչնչացնելը մարդկություն ոչնչացնել է նշանակում: Սա պատմական կոտորած է: Հանուն ժողովուրդների եղբայրության և հավասարության դու էլ քո ստորագրությամբ կանխիր այս կործանումը»,- նշվում է հայտարարության մեջ: