Բաքվի համար «անցանկալի անձանց» ցուցակում են նաեւ ԼՂՀ երբեք չայցելած անձինք

Վաշինգտոնում արտաքին քաղաքականության գծով Ամերիկյան խորհրդի ավագ փորձագետ Վեյն Մերին դատապարտել է պաշտոնական Բաքվի’ այն 335 արտասահմանցիների «անցանկալի անձ» հայտարարելու որոշումը, ովքեր «առանց Ադրբեջանի իշխանություններից թույլտվություն ստանալու» այցելել են Լեռնային Ղարաբաղի Հանրապետություն: Վեյն Մերին «Թուրան»-ի թղթակցի հետ զրույցում ասել է, որ «դրանով Ադրբեջանի իշխանությունները վնաս են հասցնում իրենք իրենց»:

«Ճիշտ կլիներ անմիջապես Ադրբեջան հրավիրել բոլոր նրանց, ովքեր այցելել են Ղարաբաղ, եւ առաջարկել ծանոթանալ մյուս կողմի դիրքորոշմանը: Բաքվի ներկայիս քաղաքականությունը հակառակ արդյունքը կտա եւ «սեւ ցուցակի» մարդիկ չեն կարող իմանալ Ադրբեջանի դիրքորոշումը, եթե անգամ շատ ցանկանան: Ադրբեջանի նման դիրքը վերջին շրջանում Բաքվի կողմից իրագործվող ինքնամեկուսացման եւ պարզունակ քաղաքականության օրինակ է միայն», -ասել է փորձագետը:

Վեյն Մերին 20 տարի աշխատել է ԱՄՆ Պետքարտուղարությունում եւ պաշտպանական կառույցներում, ԼՂՀ է այցելել անցյալ տարի եւ միջազգային հանրությանը կոչ արել ավելի շատ ուշադրություն դարձնել հակամարտությանը:

Բաքվի այդ «սեւ ցուցակում» կան ԱՄՆ 35 քաղաքացիների անուններ եւս, որոնց թվում’ լրագրողների, փորձագետների, քաղաքացիական հասարակության ներկայացուցիչների եւ այլոց:

Ամենահետաքրքիրն այն է, որ այդ զավեշտալի ցուցակում, որի հրապարակումն առաջացրել է ոչ միայն այնտեղ ընդգրկված բոլոր մարդկանց, այլ նաեւ ամբողջ աշխարհի առաջադեմ հանրության ծիծաղը, ընդգրկված են նաեւ երբեք ԼՂՀ-ում չեղած մարդկանց անուններ, ինչպիսին, օրինակ Նիկոլաս Վոնդրան է:

«Ես երբեք չեմ եղել Ղարաբաղում, բայց իմ որոշ գործընկերներ եղել են: Դե, քանի որ արդեն ինձ մտցրել են սեւ ցուցակ, ապա այժմ պետք է մեկնել այնտեղ’ որպես Կովկասի գծով մասնագետ», -»Թուրան»-ի թղթակցին ասել է Նիկոլաս Վոնդրան, ում անունը նշված է ԼՂՀ այցելած’ Ջոն Հոպկինսի համալսարանի 16 ուսանողների թվում: