Գյումրու թատրոնը մենադրամայով Երեւան է գալիս

Դերասանուհի Հասմիկ Սուվարյանի եւ ռեժիսոր Ռաֆայել Ասատրյանի «Հասմիկը» կներկայացվի Տիկնիկային թատրոնում

Գյումրու Վ. Աճեմյանի անվան պետական դրամատիկական թատրոնի գեղարվեստական ղեկավար Լյուդվիգ Հարությունյանը «Առավոտի» հետ զրույցում նշեց, որ հունիսի 14-ին Հովհ. Թումանյանի անվան տիկնիկային թատրոնում՝ «Արմմոնոյի» շրջանակում կներկայացնեն իրենց թատրոնի մենաներկայացումը, որ «Հասմիկ» է կոչվում, դերասանուհին Հասմիկ Սուվարյանն է, ռեժիսորը Ռաֆայել Ասատրյանը, պիեսը Աստղիկ Սիմոնյանինն է:

«Անցյալ տարի մենք չմասնակցեցինք փառատոնի առցանց ձեւաչափին, ուրախ ենք, որ այս տարի մասնակցում ենք: Հաճելի է, որ փառատոնը շրջանակն ավելի է մեծացրել, եւ արդեն մարզային թատրոններն էլ են ներգրավված: Մենք համագործակցեցինք փառատոնի տնօրինության հետ եւ 2 ներկայացում խաղացինք Գյումրիում: Մեկը Նարինե Ալեքսանյանի «Նա» ներկայացումն էր, որը հանդիսատեսը շատ ջերմ ընդունեց: Գյումրու Վ. Աճեմյանի անվան պետական դրամատիկական թատրոնն էլ իր դերասանուհու հետ մոնոներկայացումը հունիսի 14-ին խաղալու է Երեւանում: Պիեսի հեղինակը Աստղիկ Սիմոնյանն է, բեմական տարբերակն էլ կոչվում է «Հասմիկ»: Սա մենադրամա է: Թեման շատ հետաքրքիր է, իսկ երաժշտական ձեւավորումը մեր սիրելի մաեստրո Ռոբերտ Ամիրխանյանն է արել: Հուսամ՝ Երեւանում ինքը նույնպես ներկա կլինի»,-ասաց Լյուդվիգ Հարությունյանը: Նրա խոսքով. «Նմանատիպ փառատոները մեծ հնարավորություն են տալիս միջազգային ասպարեզում դերասանին ընկալելու: Ինչ վերաբերում է «Հասմիկ» մենադրամային, այն Գյումրիում արդեն մեկ տարի է՝ խաղում ենք: Ներկայացումը ջերմ է ընդունվել, այն, ինչ դերասանուհին ու իր ռեժիսորը ներկայացնում են, շատ այսօրեական է, ներկայացման հասցեատերը եւ տղամարդիկ են, եւ կանայք, թեման դստեր եւ հոր հարաբերություններն են»:

Գյումրու Վ. Աճեմյանի անվան պետական դրամատիկական թատրոնի գեղարվեստական ղեկավարը խոսելով իրենց թատրոնից, ասաց, որ 2020թ. համավարակով պայմանավորված՝ բարդ տարի էր բոլորի համար ու չնայած դժվարին ժամանակներին, մշակութային կյանքը չպետք է կանգ առնի:

«Մեր թատրոնն արդեն 2 պրեմիերա է ունեցել, 2021-ը սկսել ենք հյուրախաղերով, նոր ներկայացում բեմադրեցինք` Բաբկեն Զաքարյանի աշխատանքը: Ներկայացումը կոչվում է «Քեյս», այն ֆարս է երկու գործողությամբ: Բեմադրության հեղինակը ես եմ, այն մի քանի անգամ խաղացել ենք եւ կրկին ջերմ ընդունելության արժանացել, մայրաքաղաքում եւս առիթ ենք ունեցել խաղալու: Մեր «Հարսանիք թիկունքում» ներկայացումը կրկին բեմ է վերադարձել, խաղացել ենք Գյումրիում եւ Երեւանում, պատրաստվում ենք այլ ներկայացումներով էլ հանդես գալ Հայաստանի տարբեր մարզերում: Առաջիկայում սկսում ենք շատ մեծ ներկայացում` «Մաուգլին», որը ոչ թե մանկական է, այլ մեծերի համար, երաժշտական ձեւավորումը «Բամբիռինն» է: Մեր թատրոնը ցանկանում է այդ աշխատանքն ունենալ իր խաղացանկում, հատկապես որ «Մաուգլին» այսօր անհրաժեշտ է, որովհետեւ պետք է մոտենանք բնությանը, հոգատար լինենք միմյանց հանդեպ: Ասելիքս այն է, որ 2021-ին Գյումրու դրամատիկական թատրոնի խաղացանկը լինելու է ավելի դրական ու լավատեսական ներկայացումներով»,-ընդգծեց մեր զրուցակիցը:

Գոհար ՀԱԿՈԲՅԱՆ

Լուսանկարը՝ Photoservice ANI-ի

Աղբյուր՝ Aravot.am