Հաջորդ երեքշաբթի Վրաստանի կառավարությունը կքննարկի նոր սահմանափակումներ մտցնելու հարցը

Հաջորդ երեքշաբթի Վրաստանի կառավարությունը կքննարկի նոր սահմանափակումներ մտցնելու հարցը

Վրաստանի Առողջապահության նախարար Էկատերինե Տիկարաձեն լրագրողների հետ զրույցում նշել է, որ դիմակ կրելը ինչպես փակ, այնպես էլ բաց տարածքներում կարող է կրկին պարտադիր դառնալ: Այս մասին տեղեկացնում է Panorama.am-ը՝ հղվելով վրացական կայքերին։

«Առողջապահության նախարարությունը և Հիվանդությունների վերահսկման կենտրոնը միջգերատեսչական խորհրդին է ներկայացրել բոլոր այն հանձնարարականները, որոնք, մեր կարծիքով, պետք է կյանքի կոչվեն: Իհարկե, առաջին հանձնարարականը դիմակի օգտագործումն է: Կարևոր է նաև ավելի մեծ ուշադրություն դարձնել սոցիալական միջոցառումների անցկացմանը, ներառյալ հարսանիքներն ու հոգեհացերը: Անհրաժեշտ է սահմանափակել մասնակիցների թիվը»,- ասել է Տիկարաձեն:

Առողջապահության նախարարի խոսքով, համակարգող խորհրդի նիստը, որի ընթացքում կքննարկվի սահմանափակումների հարցը, տեղի կունենա հաջորդ երեքշաբթի:

Լրատվամիջոցը նաև հիշեցնում է, որ հունիսի 22-ից Վրաստանում բաց տարածքներում դիմակ կրելը պարտադիր չէ: Այս սահմանափակումը դեռ ուժի մեջ է փակ տարածքներում, հասարակական տրանսպորտում և տրանսպորտի կանգառներում:

Հետևեք մեզ նաև Telegram-ում