Իշխան Սաղաթելյանը ներկայացրեց ընդդիմության առաջիկա անելիքները

Իշխան Սաղաթելյանը ներկայացրեց ընդդիմության առաջիկա անելիքները

ԵՐԵՎԱՆ, ՄԱՅԻՍԻ 30, Times․am: «Դիմադրության» շարժման անդամ, ԱԺ «Հայաստան» խմբակցության պատգամավոր Իշխան Սաղաթելյանը ներկայացրեց ընդդիմության անելիքները մայիսի 30-ին և 31-ին:

«Արմենպրես»-ի փոխանցմամբ՝ Ֆրանսիայի հրապարակում լրագրողների հետ զրույցում Սաղաթելյանը հայտնեց, որ մայիսի 30-ին, ժամը 19:30-ին Ֆրանսիայի հրապարակում կհավաքվեն, որտեղ տեղի կունենա աշխատանքային զրույց քաղաքացիների հետ:

«Ժամը 19:30-ին հավաքվելու ենք: Մեր այսօրվա հավաքը մի փոքր այլ ֆորմատով է լինելու: Լինելու է աշխատանքային զրույց մեր քաղաքացիների հետ, որովհետև հաճախ անմիջական շփումն ավելի կարևոր է»,- ասաց նա՝ հավելելով, որ հավաքի ընթացքում կլսեն քաղաքացիներին, բացատրություններ կտան, կամփոփեն իրենց կատարած աշխատանքները, կպլանավորեն հաջորդ օրվա անելիքները:

Իշխան Սաղաթելյանը հայտնեց, որ մայիսի 31-ի առավոտից սկսելու են անհնազանդության ակցիաները, իսկ երեկոյան տեղի կունենա հանրահավաք և երթ:

Նա նաև հայտնեց, որ կառավարության 3-րդ մասնաշենքի մոտ տեղի ունեցած ակցիայի ընթացքում բերման ենթարկվածների թիվը հասնում է մի քանի հարյուրի:

Ոստիկանությունը դեռևս բերման ենթարկվածների թիվ չի հայտնել:

Հետևեք մեզ նաև Telegram-ում