Ադրբեջանական հարձակման արդյունքում 7600 անձ է տեղահանվել. ՄԻՊ

ԵՐԵՎԱՆ, ՍԵՊՏԵՄԲԵՐԻ 16, Times․am: Հայաստանի վրա ադրբեջանական հարձակման արդունքում Գեղարքունիքի, Սյունիքի ու Վայոց Ձորի մարզերում իրենց բնակավայրերից տեղահանվել են առնվազն 7600 անձ։ Իր Ֆեյսբուքյան էջում այս մասին գրել է ՀՀ մարդու իրավունքների պաշտպան Քրիստինե Գրիգորյանը։

Նա նշել է, որ տեղահանվածների մեծամասնությունը կանայք, երեխաներ (1437), ծերեր ու հաշմանդամություն ունեցող անձինք (99) են։

Հիշեցնենք, որ երեկ ՀՀ ՄԻՊ Քրիստինե Գրիգորյանը հայտարարել էր, որ ադրբեջանական զինված ուժերի կողմից տարբեր տեսակի զինտեխնիկայի կիրառումը առավել ինտենսիվ է հատկապես երեխաների դպրոց և մանկապարտեզ հաճախելու ժամերին:

Պաշտպանը հրավիրել էր երեխաների իրավունքների պաշտպանությամբ զբաղվող միջազգային կառույցների ուշադրությունը՝ հստակ արձագանքելու ՀՀ–ի նկատմամբ ադրբեջանական զինված ուժերի հարձակման հետևանքով երեխաների իրավունքների կոպտագույն խախտումներին։