Մեծ Սեպասար գյուղի տներից մեկում խոշոր հրդեհ է բռնկվել․ հոսպիտալացվել է 4 մանկահասակ երեխա. ԱԻՆ

ԵՐԵՎԱՆ, ՀՈԿՏԵՄԲԵՐԻ 20, Times․am: Հոկտեմբերի 19-ին, ժամը 21։43-ին Շիրակի մարզային ճգնաժամային կառավարման կենտրոն ահազանգ է ստացվել, որ Մեծ Սեպասար գյուղում այրվում է տուն:

Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ։

Պարզվել է, որ հրդեհը բռնկվել է 1-ին փողոցի տներից մեկի հյուրասենյակում:
Մինչ հրշեջ-փրկարարների կանչի վայր հասնելը՝ հրդեհը մարվել է տեղի ուժերով։ Այրվել է հյուրասենյակի հատակից մոտ 0․5 քմ հատված։

Տնից ծխահարված վիճակում դուրս են բերվել Ա․ Գ․-ն (ծնված 2016 թ․), Հ․ Գ․-ն (ծնված 2017 թ․), Ի․ Գ․-ն (ծնված 2019 թ․) և Դ․ Գ․-ն (ծնված 2021 թ․), որոնք հոսպիտալացվել են Աշոցք քաղաքի «Տիրամայր Նարեկ» հիվանդանոց, որտեղ բժիշկները տուժածների առողջական վիճակը գնահատել են միջին ծանրության։