Զապորոժիեի ատոմակայանը միջուկային վթարի վտանգի տակ է
![Զապորոժիեի ատոմակայանը միջուկային վթարի վտանգի տակ է](https://times.am/v3/wp-content/uploads/2022/11/f14f56c2f5ca2369c81143be37369f5c.jpg)
Նմանատիպ
Ռուսաստանի ատոմային էներգիայի պետական գործակալությունը՝ «Ռոսատոմ»-ը, զգուշացրել է Եվրոպայի ամենամեծ՝ Զապորոժիեի ատոմակայանում միջուկային վթարի վտանգի մասին, որն առաջացել է նախորդ շաբաթվա վերջի գնդակոծությունից հետո:
Մոսկվան և Կիևը ամիսներ շարունակ միմյանց մեղադրել են ատոմակայանը գնդակոծելու հարցում: Նախորդ կիրակի վերսկսված հրետակոծությունը նոր մտավախություններ է առաջացրել հնարավոր աղետի մասով:
«Ատոմակայանը միջուկային վթարի վտանգի տակ է: Մենք ամբողջ գիշեր բանակցություններ էինք վարում Ատոմային էներգիայի միջազգային գործակալության (ՄԱԳԱՏԷ) հետ»,- նշել է «Ռոսատոմ»-ի գործադիր տնօրեն Ալեքսեյ Լիխաչովը:
«ՄԱԳԱՏԷ»-ն, իր հերթին, կոչ է արել ատոմակայանի շուրջ ստեղծել անվտանգության գոտի, ինչը, ըստ Լիխաչովի, հնարավոր կլինի միայն ԱՄՆ հավանության դեպքում:
«Կարծում եմ, որ Վաշինգտոնի և Զապորոժիեի միջև հեռավորությունը չպետք է ԱՄՆ-ի համար փաստարկ դառնա անվտանգության գոտու մասին որոշումը հետաձգելու համար», – հայտարարել է Լիխաչովը։
«Ռոսատոմի» ղեկավարը նաև նշել է, որ Կիևն ատոմակայանում «պատրաստ է ընդունել փոքր միջուկային վթար»:
«Սա նախադեպ կլինի, որը ընդմիշտ կփոխի պատմության ընթացքը: Ուստի պետք է ամեն ինչ անել, որպեսզի ոչ ոք չխախտի ատոմակայանի անվտանգությունը», – ընդգծել է Լիխաչովը:
Հետևեք մեզ նաև Telegram-ում