Թուրքիայի քրդերը մերժել են Էրդողանի «Դեմոկրատացման փաթեթը»

Թուրքաբնակ քրդերը Դիարբեքիրում տասնյակ հազարավոր մարդկանց մասնակցությամբ անցկացրած միտինգում հայտարարել են, որ «չեն ճանաչում, չեն ճանաչելու եւ մերժում են» վարչապետ Էրդողանի «Դեմոկրատական փաթեթը»: Հանրահավաքում, որն անցել է «Օջալանին ազատություն, քրդերին կարգավիճակ» կարգա խոսով, այդ մասին հայտարարել է Թուրքիայի խորհրդարանում 35 պատգամավորներ ունեցող միակ քրդական Խաղաղություն եւ ժողովրդավարություն կուսակցության (BDP) առաջնորդի օգնական Մարալ Բեշթաշը:

«Իրականում այս փաթեթում քրդերի համար ոչ մի նոր բան չի առաջարկվում: Քրդերի բանտերում գտնվելը կշարունակվի, մայրենի լեզվով կրթությունը մերժվել է, ընտրական շեմը չի նվազեցվել, Իմրալի բանտում Աբդուլլա Օջալանի բանտային պայմանները չեն փոխվել, չեն կատարվել քրդական խնդրի լուծման հարցում Օջալանի առաջադրած պայմանները: Այդ պատճառով, մենք այդ փաթեթը չենք ճանաչում եւ չենք ճանաչելու»,- ասել է նա: Հայտարարությունը հավանության է արժանացել միտինգի բոլոր մասնակիցների կողմից:

Էրդողանի «Դեմոկրատացման փաթեթը» քննադատել է նաեւ քրդական Դեմոկրատական հասարակության կոնգրեսի համանախագահ Ահմեդ Թուրքը: Նշելով, որ փաթեթը շատ հեռու է հասարակության մեջ խաղաղություն եւ համաձայնություն հաստատելուց, քուրդ առաջնորդն ասել է. «Փաթեթում քրդերի հետ կապված ոչ մի նոր բան չկա: Այն ամբողջությամբ դատարկ է»:

Թուրքիայի վարչապետի հրապարակած «Դեմոկրատացման փաթեթը» անգլիական «Թայմս» թերթը ներկայացրել է «Թուրքիայում գլխաշորի արգելքի վերացումը հարված է աշխարհիկ պետությանը» վերնագրով, եւ գրել, որ գլխաշորի արգելքը Թուրքիայի հանրապետության հիմնադրումից այս կողմ աշխարհիկ սկզբունքները ներկայացնող ուժեղ խորհրդանիշ էր:

ԱՄՆ պետքարտուղարության խոսնակ Ջեն Փսակին էլ հայտարարել է, որ «դեմոկրատացման բարեփոխումը գոհացուցիչ է, սակայն, հիասթափեցնող է այն, որ այնտեղ ոչ մի խոսք չկա 1974 թ-ին փակված հունական հոգեւոր դպրոցը վերաբացելու մասին»: