Լեհաստանում թուրք ուսանողներին ձերբակալել են հրեա զբոսաշրջիկներին նացիստական ողջույն հղելու համար

Լեհաստանի Լյուբլին քաղաքի մոտ գտնվող նացիստական Մայդանեկ համակենտրոնացման ճամբար այցելած հրեա զբոսաշրջիկներին նացիստական «Հայլ» ողջույն հղելու համար ոստիկանությունը ձերբակալել է երկու թուրք ուսանողի: Ինչպես հաղորդում է «Արմենպրես»-ը, այս մասին հայտնում է լեհական TVN24 հեռուստաալիքը:

Թուրքիայի քաղաքացի ուսանողներ 24-ամյա Մեսութ Թ.-ն եւ 20-ամյա Մեհմեթ Ա-ն Իսրայելից Մայդանեկի թանգարան այցելած զբոսաշրջիկների խմբին ողջունել են բարձրացնելով ձախ ձեռքը եւ «Հայլ» բացականչել:

Թուրք ուսանողները ձերբակալվել են իսրայելցիների բողոքի արդյունքում: Նրանք մեղադրվում են հրեաներին վիրավորելու եւ ֆաշիստական ռեժիմի քարոզչության մեջ: Թուրք երիտասարդները հայտարարել են, որ կատակ են արել: Սակայն, եթե դատարանը մեղավոր ճանաչի նրանց, ապա Erasmus ծրագրով Լյուբլինի տեխնոլոգիական համալսարանում սովորող թուրք երիտասարդները կազատազրկվեն 3 տարի ժամկետով: