Դավիթ Հարությունյանը չի բացառում Ադրբեջանի պատվիրակության հետ հանդիպման հնարավորությունը

Եվրոպայի խորհրդի Խորհրդարանական վեհաժողովի ձմեռային նստաշրջանի օրակարգը թեեւ անմիջականորեն Հայաստանին չի առնչվում, սակայն երկրի համար հետաքրքրություն ներկայացնող բազմաթիվ հարցեր են ներառված: Այս մասին «Արմենպրես»-ի հետ զրույցում ասաց ԵԽԽՎ-ում Հայաստանի պատվիրակության ղեկավար Դավիթ Հարությունյանը: Նա նաեւ չի բացառում վեհաժողովի նստաշրջանի ընթացքում ադրբեջանական պատվիրակության հետ հանդիպումը: «Չեմ կարծում, որ այս նստաշրջանի ընթացքում նման հանդիպում կլինի, քանի որ վեհաժողովի նախագահի ընտրություններ են լինելու, բայց նաև չեմ բացառում»,-ասաց Հարությունյանը:Բացի նախագահի ընտրությունից, ԵԽԽՎ ձմեռային նստաշրջանի օրակարգում ընդգրկված են Մարդու իրավուքների եվրոպական դատարանում Սլովակիայի և Դանիայի մի շարք դատավորների նշանակման, Եվրոպայում միգրանտների, սիրիացի փախստականների հետ կապված և այլ հարցեր: «Նստաշրջանի ընթացքում մի շարք կոմիտեներ իրենց զեկույցներն են ներկայացնելու»,- նշեց Հարությունյանը:

Դավիթ Հարությունյանի խոսքով՝ նստարջանի օրակարգում ընդգրկված հարցերից հետաքրքիր է հատկապես Ռասիզմի և անհանդուրժողականության դեմ ռազմավարության հարցի քննարկումը: «Եվս մեկ առանձին թեմա կա «Ռասիզմը ոստիկանության համակարգում» խորագրով, որը, մեր կարծիքով, շատ հետաքրքիր է»,- նշեց նա:

ԵԽԽՎ հայաստանյան պատվիրակության ղեկավարը կարևորեց նաև Պաղեստինին առնչվող մի շարք հարցերի քննարկումը: «Քննարկվելու են Պաղեստինի հետ կապված մի շարք հարցեր: Մասնավորապես, քննարկվելու է Պաղեստինի ազգային խորհրդի հետ գործընկերություն հանուն ժողովրդավարության նախագիծը, ինչը հետաքրքիր է որովհետև Պաղեստինը, լինելով չճանաչված երկիր, Եվրոպայի կողմից մի շարք գործընթացներում ընդգրկվում է»-եզրափակեց Հարությունյանը:

ԵԽԽՎ ձմեռային նստաշրջանը կմեկնարկի 2014թ.-ի հունվարի 27-ին և կշարունակվի մինչև հունվարի 31-ը: Վեհաժողովին ուղերձով կդիմեն Ավստրիայի Դաշնային կանցլեր Վերներ Ֆայմանը եւ Եվրոպական խորհրդարանի նախագահ Մարտին Շուլցը: ԵԽԽՎ նախագահը ներկայում Ժան Կլոդ Մինյոնն է: