Օլանդը կոչ է արել Թուրքիային առերեսվել պատմության հետ

Երկօրյա պաշտոնական այցով Թուրքիայում գտնվող Ֆրանսիայի նախագահ Ֆրանսուա Օլանդն իր թուրք պաշտոնակից Աբդուլլահ Գյուլի հետ Անկարայում հանդիպումից հետո կազմակերպված մամուլի ասուլիսում հայտարարել է, որ «հաշտություն և համաձայնություն ապահովելու համար անհրաժեշտ է ճանաչել 1915 թ-ի իրադարձությունները», իսկ «Հայոց ցեղասպանության ժխտումը քրեականացնող օրենքը պետք է կիրառել միջազգային համաձայնագրերի շրջանակում»:

«Պատմությունը ճանաչելու համար տարվող աշխատանքները կարող են ցավոտ լինել, բայց դա պետք է արվի խաղաղություն եւ հաշտություն ապահովելու համար: Հիմա մտնում ենք պատմության օրակարգային ժամանակաշրջան: Այս տարի Առաջին համաշխարհային պատերազմի 100-րդ տարելիցն է, հետո’ 2015-ն է: Պետք է անենք ճիշտն ու իրավականը, եւ դա այնպես անենք, որ բոլորը հասկանան թեման: Դրա հետ կապված Ֆրանսիայում օրենք է ընդունվել, 2008 թ-ին շրջանակային որոշում է ընդունվել: Անհրաժեշտ է դրանք կիրառել միջազգային համաձայնագրերի շրջանակում», -ասել է Օլանդը:

Անդրադառնալով Թուրքիայի’ Եվրամիությանն անդամակցության հարցին, Ֆրանսիայի նախագահն ասել, որ Թուրքիայի և ԵՄ միջև շարունակվող բանակցությունները դեռեւս չեն նշանակում, որ դրանք կավարտվեն լիիրավ անդամակցությամբ: Նա մեկ անգամ ևս շեշտել է, որ Թուրքիայի ԵՄ անդամակցության հարցը ենթակա է հանրաքվեի Ֆրանսիայում և կախված է այդ հանրաքվեի արդյունքներից:

Թուրքիայի նախագահ Գյուլն իր երկրի կողմից Հայոց ցեղասպանության ճանաչման հարցի հետ կապված կրկին հայտարարել է, որ այն պետք է թողնել պատմությանը և պատմաբաններին: «Այն տարիների ցավերը ճիշտ չէ փոխադրել սերունդից սերունդ: Պետք է այն թողնել պատմաբաններին: Մենք բացել ենք մեր բոլոր արխիվները, վերացրել ենք թեման քննարկելու հետ կապված արգելքները: Խնդիրը պետք է լուծել պատմաբանների հետ», -ասել է նա: