Եվրոպայի խորհրդի ղեկավարը կոչ է արել Ուկրաինայի իշխանություններին անհապաղ հետաքննել սպանությունները

Եվրոպայի Խորհրդի Գլխավոր քարտուղար Թորբյորն Յագլանդը կոչ է արել Ուկրաինայի անցումային կառավարությանը շուտափույթ իրավական բարեփոխումներ իրականացնել, ինչպես նաեւ բացահայտել երկրում անկարգությունների ժամանակ տեղի ունեցած սպանությունները: Ինչպես հաղորդում է «Արմենպրես»-ը’ վկայակոչելով ria.ru-ն, այս մասին հայտարարել է Deutsche Welle մեդիա-ընկերությունը: «Այդ սպանությունները պետք է անհապաղ ? ?ետաքննվեն’ հետագա շահարկումներից խուսափելու համար»,- նշված է հայտարարության մեջ:

Եվրոպայի խորհրդի ղեկավարը կոչ է արել նաեւ բարեփոխումներ իրականացնել երկրի արդարադատության եւ ընտրական իրավունքի ոլորտներում:

Գլխավոր քարտուղարն անդրադարձել է Նախագահ Վիկտոր Յանուկովիչի եւ ընդդիմության միջեւ Գերմանիայի, Լեհաստանի եւ Ֆրանսիայի նախարարարների միջնորդությամբ կայացած համաձայնությանը: Այդ փաստաթղթով կողմերը պայմանավորվել էին ապահովել երկրում փոքրամասնությունների պաշտպանությունը, ինչպես նաեւ Ուկրաինայի անցումային կառավարությունում ապահովել երկրի բոլոր կուսակցությունների եւ մարզերի մասնակցությունը, որը ներկյաումս չի արվում:

Յագլանդը մտահոգություն է հայտնել, նշելով, որ ստորագրված պարտավորությունների հետագա ձգձգումը կբերի երկրի ապակայունացմանը:

Ուկրաինայում քաղաքական ճգնաժամը սկսվել է 2013 թվականի նոյեմբերին: Փետրվարի 22-ին երկրում տեղի է ունեցել իշխանափոխություն: