Սիրիացի ջիհադականները Ադրբեջանին սպառնում են խալիֆայությունով
Նմանատիպ
Սոցիալական ցանցերում Սիրիայում հակակառավարական ուժերի կազմում «Իրաքի եւ Լեւանտի իսլամական պետություն» կոչված խմբավորման կողմից Բաշար Ասադի վարչակարգի դեմ կռվող ադրբեջանցիների մասնակցությամբ նոր տեսանյութ է տարածվել, որտեղ վերջիններս հայտարարում են, որ Սիրիայում արդեն կախել են Խալիֆայության (կրոնական միապետություն) դրոշը, եւ «դատաստանի օրը բոլորն անցնելու են այդ դրոշի տակով»: Այս մասին, ինչպես հաղորդում է «Արմենպրես»-ը, հայտնում է azvizion.az լրատվական կայքը:
Սիրիայում կռվող ադրբեջանցի մոջահեդները տեսանյութում դիմում են Ադրբեջանին ու ադրբեջանցիներին եւ հայտարարում, որ եթե նրանք ցանկանում են արժանի լինել նման պատվի, ապա թող մեկնեն Սիրիա:
Ադրբեջանական ԶԼՄ-ներն ավելի վաղ հայտնել էին, որ Սիրիայում կառավարական ուժերի դեմ խմբավորումների կազմում մոտ 500 ադրբեջանցի մոջահեդներ են կռվում, որոնք իսլամի սունի ուղղության վահաբի եւ սալաֆի աղանդների հետեւորդներ են: Սիրիայում կառավարական ուժերի դեմ իսլամիստական խմբավորումների մարտերում 2014 թ. ընթացքում սպանված Ադրբեջանի քաղաքացի մոջահեդների թիվն արդեն գերազանցում է 80-ը, իսկ Սիրիայում ընթացող պատերազմում մինչ օրս 150-ից ավելի ադրբեջանցիներ են զոհվել: Թուրքիայում Ադրբեջանի դեսպանատունը հաստատել է ադրբեջանցի մոջահեդների’ Թուրքիայի տարածքով Սիրիա անցնելու փաստը:
Jam.az լրատվական կայքը հայտնել էր, որ Ադրբեջանում գործող «Մեշա գարդաշլարը» (Անտառի եղբայրներ) եւ «Ջեյշուլլահ» (Ալլահի բանակ) արմատական իսլամիստական կազմակերպությունները հունվարի 29-ին հանդես էին եկել Ադրբեջանի իշխանության դեմ ահաբեկչական գործողություններ սկսելու մասին հայտարարությամբ: Նրանք սպառնացել են Բաքվում առաջին իսկ հարձակման ժամանակ 100 ոստիկան սպանել: «Ջեյշուլլահ» կազմակերպության տարածած հայտարարության մեջ էլ ասվում է, որ շուտով իրենք ջիհադ (սրբազան պատերազմ) են հայտարարելու Ադրբեջանում:
Հետևեք մեզ նաև Telegram-ում