«Ընտրություններից հետո ռազմական գործողությունները չեն մեղմվելու. ԱՄՆ-ը Թուրքիային հաչեցնելու է Սիրիայի վրա». Հացպանյան
Նմանատիպ
Սիրիայի նախագահական ընտրությունների արդյունքները կհրապարակվեն 24 ժամից ոչ շուտ: Հասարակական, քաղաքական գործիչ Սարգիս Հացպանյանի պնդմամբ՝ Ասադը վերընտրվելու է, որովհետև մյուս երկու թեկնածուները երևելի դեմքեր չէին և չէին կարող այլընտրանք կամ մրցակից լինել նրան: Իսկ ընտրությունների և Ասադի մասնակցության մեսիջը հետևյալն էր՝ թեկուզ ռմբակոծվող երկրում մարդիկ ուզում են կայունություն, ուզում են շարունակվի քաղաքական և հասարակական կյանքը:
«Հենց այս «քաղաքացիական» տրամաբանությունից ելնելով էլ, որ իրականում ընտրություններ են անցկացվում, մի քանի ժամով քվեարկության ընթացքը երկարաձգեցին, քվատուփերն ավելացրեցին»,-լրագրողների հետ հանդիպմանը նկատեց Հացպանյանը:
Ըստ նրա՝ Սիրիայում նախագահական ընտրությունները բացի ՆԱՏՕ-ի անդամ երկրներից, մյուսների համար ըստ էության, ընկալելի են: Մյուս կողմից՝ անգամ Ասադի ոչ կողմնակիցներից որոշների համար նա անցումային ժամանակահատվածի, երկրի կայունությունը վերականգնելու թեկնածու էր:
Կհաջողվի՞ Ասադին ընտրություններից հետո մեղմել ռազմական գործողությունները կամ որքանո՞վ է հնարավոր, որ հակառակ կողմը զենքերը վայր կդնի, Սարգիս Հացպանյանի դիտարկմամբ՝ պատերազմական գործողությունները և հայկական թաղամասերի ռմբակոծումները կշարունակվեն և նույնիսկ նոր թափ կստանան.
«Թուրքիան ԱՄՆ-ի շունն է և ընտրություններից հետո Թուրքիային հաչեցնելու են Սիրիայի վրա: Երկրորդ՝ օգոստոսին այս երկրում սպասվում են ընտրություններ և Էրդողանը թուրը ձեռքին և ձիու վրա նստած՝ պետք է դիվիդենտներ շահի՝ արտաքին դաշտում որոշակի վարկանիշ ապահովելու համար:
Մյուս կողմից՝ Սիրիայում հետագա իրավիճակը կախված է ՌԴ-ից կամ ուկրաինական զարգացումներից, քանի որ այստեղ կատարվածը սիրիական դեպքերի շարունակությունն էր կամ հակառակը: Չմոռանանք, որ Քեսաբի իրադարձությունները գործողություններ էին Ղրիմի անկախացման և ՌԴ-ին միացման դեմ»,-մանրամասնեց Սարգիս Հացպանյանը:
Ինչ վերաբերում է Սիրիայի հայ համայնքի ճակատագրին, անելիքներին, ազատամարտիկը նկատեց, որ նրանց գոյությունը փրկելու համար պետք է կազմակերպել նրանց տեղափոխումը Հայաստան.
«Ցանկացած հայ մարդու համար իր տեսակը շարունակելու միակ հանգրվանը Հայաստանն է, որտեղ հայն է իշխանությունը: Հայ համայնքը կրկնակի նվազել է, 100 հազարից այսօր 50-ն է մնացել, վաղը դա էլ կկիսվի, ուստի օր առաջ, ոչ թե օտար երկիր, այլ Հայաստան բերելը պետք է կազմակերպվի»:
Այս համատեքստում Հացպանյանը տեղեկացրեց, որ ազգային փոքրամասնություններից այս երեք տարվա ընթացքում հայկական համայնքն է ամենաքիչ զոհը տվել՝ մոտ հարյուր հոգի:
Հետևեք մեզ նաև Telegram-ում