«Պետք չէ քաղցկեղով հիվանդի օրգանիզմը փորփրել, եթե հիվանդության դեմ դեռ դեղամիջոց չկա».Վլադիմիր Մամոնտովը ԼՂՀ խնդրի մասին
Նմանատիպ
«Չպետք է անել այն, ինչ կարելի է չանել»,-օրեր առաջ Ծաղկաձորում «Երիտասարդ Եվրասիա» երիտասարդական համաժողովի շրջանակում քննարկումներից մեկի ժամանակ նման կարծիք հայտնեց «Խելամիտ ինտերնետ» հիմնադրամի տնօրեն, «Խոսում է Մոսկվան» ռադիոկայանի գլխավոր տնօրեն Վլադիմիր Մամոնտովն`անդրադառնալով աշխարհաքաղաքական զարգացումներին և առհասարակ, համաշխարհային քաղաքական կանոններին:
«Օրինակ`Խրուշչովը կարող էր Ղրիմը չնվիրել Ուկրաինային`իր մեղքերի դիմաց: Բայց մենք չէինք կարող Ղրիմը չվերցնել, այդ ամենը մեր կոկորդին էր հասել: Հետո այստեղ մոտ 2 միլիոն մեր հայրենակիցների անվտանգության հարցը կար, սևծովյան նավատորմի…»,-շարունակեց Մամոնտովը` նկատելով, թե նրանք, ովքեր ասում են`գնանք ու մորթենք, առաջինը հենց իրենք են փախնում կամ թեժ պահին տանը նստած «նկարում»:
Պատեհ առիթն օգտագործելով ներկա հայ մասնակիցներս փորձեցինք պարզել «Խոսում է Մոսկվան» ռադիոկայանի գլխավոր տնօրենի կարծիքը Արցախի խնդրի հետ կապված`միթե մեր կոկորդին չէր հասել: Մամոնտովը, սակայն, համառորեն դիվանագետին հատուկ ոճով հարցը շրջանցում էր`թեման տեղափոխելով ուկրաինական զարգացումների հարթություն, նաև ակնարկում,թե չի կարելի մի բանի մասին խոսել, որին մոտիկից ծանոթ չես կամ տվյալ վայրում չես եղել ու ապրել:
Մենք,իհարկե, ոչ պակաս համառ գտնվեցինք և հարցը կրկնեցինք, ինչին ի պատասխան Մամոնտովը հասկացրեց, թե միամտություն է աշխարհից որևէ լուծում սպասելը, եթե դա իրենց շահերից չի բխում, այլ կերպ` հույսներս մեր վրա պիտի դնենք: Ավելին, նա նկատեց, թե պետք է զգուշանալ կոնկրետ առաջարկներից.
«Պետք չէ քաղցկեղով հիվանդի օրգանիզմը փորփրել, եթե հիվանդության դեմ դեռ դեղամիջոց չկա: Պետք է թողնել այնպես ինչպես կա:Մեր «հիվանդն» ամուր է, կդիմանա»,-եզրափակեց նա:
Հետևեք մեզ նաև Telegram-ում