Թուրքիայի ԱԳՆ-ն հերքել է հայ-թուրքական սահմանի բացման մասին լուրերը
Նմանատիպ
Թուրքիայի արտաքին գործերի նախարարությունը հերքել է երեկ թուրքական մամուլը ողողած լուրն այն մասին, թե Թուրքիայի վարչապետ Ռեջեբ Թայիբ Էրդողանը հանձնարարել է բացել հայ-թուրքական սահմանի Ալիջանի անցակետը:
Ինչպես հաղորդում է «Արմենպրես»-ը’ վկայակոչելով Թուրքիայի ԱԳՆ-ի պաշտոնական կայքը, արտգործնախարարության խոսնակը հայտնել է, որ հայ-թուրքական սահմանի բացման մասին խոսակցությունները չեն համապատասխանում իրականությանը:
Նա նշել է, որ Թուրքիայի եւ Հայաստանի միջեւ սահմանը 1993 թվականին փակվել է իբր «ադրբեջանական հողերի գրավման պատճառով»: «Սահմանի բացումը կարող է օրակարգ գալ միայն Հարավային Կովկասում համապարփակ եւ շարունակական նորմալացման համար հնարավորություն ապահովող զարգացումների շրջանակում: Այդ հարցում որոշիչ է լինելու Հայաստանի կողմից բոլոր հարեւանների հետ խնդիրները լուծելու կամքի դրսեւորումը եւ այդ ուղղությամբ քայլեր կատարելը», -ասել է թուրք խոսնակը:
Թուրքական «Թարաֆ» թերթը երեկ հայտնել էր, որ Թուրքիայի վարչապետ Էրդողանը ապրիլի 23-ին հայերին հղած «ցավակցական» ուղերձից հետո, որպես Հայաստանի հետ հարաբերությունները բարելավելու «երկրորդ քայլ», հանձնարարել է բացել Հայաստանի հետ սահմանային Ալիջանի անցակետը: «Թեեւ հստակեցված չէ սահմանի պաշտոնական բացման ժամանակացույցը, սակայն, կուլիսներում խոսակցություններ կան, որ հավանաբար այն կբացվի սեպտեմբերին», -գրել էր թերթը:
Թուրքական թերթի այդ տեղեկատվությունը հիստերիայի հերթական ալիքն է բարձրացրել Ադրբեջանում:
Հայկական կողմը մշտապես հայտարարել է առանց նախապայմանների հարաբերությունների կարգավորման պատրաստակամության մասին, ինչին ի պատասխան ստացել է թուրքական կողմի հստակ արձագանքը’ նախապայմանների լեզվով’ երկկողմ հարաբերությունները փոխկապակցելով ԼՂ հիմնահարցի հետ:
Հետևեք մեզ նաև Telegram-ում