Ադրբեջանում երկաթուղայինները հացադուլ են սկսում գերեզմանոցում

«Ադրբեջանի երկաթուղային ուղիներ» ընկերության ուղեկցորդները մտադիր են հացադուլ սկսել որպես բողոք, որ վերջին 10 տարիների ընթացքում ղեկավարությունը չի վճարում արձակուրդայինները եւ կրճատում է աշխատավարձը: Այս մասին հայտնում է «Ազադլըգ» թերթը:

«Օրվա համար մեզ պետք է վճարվի 10 մանաթ, բայց տալիս են 5 մանաթ: Այդ ոլորտում միլիոնավոր մանաթ փող է յուրացվում, իսկ աշխատավարձին մշտապես փող չի հերիքում: Ոչ ոք մեզնով չի հետաքրքրվում: Այդ պատճառով մենք որոշել ենք 100-150 հոգով հացադուլի ակցիա սկսել: Մի կողմից աշխատավարձ չեն վճարում, մյուս կողմից’ կրճատումներ են սկսում: Իսկ ինչպե՞ս մենք պահենք մեր ընտանիքները: Եթե ակցիայի համար հարմար տեղ չգտնենք, ապա տեղ պետք է խնդրենք գերեզմանոցում. մեր մահվան դեպքում հեշտ կլինի թաղել: Գերեզմանոցում տեղն արժե 500 մանաթ: Թող մեր փողերով գոնե գերեզմանցում տեղի համար վճարեն», -հայտարարել են ադրբեջանցի ուղեկցորդները:

Ադրբեջանում ուղեկցորդների բողոքի ակցիաները սկսվել են մի քանի ամիս առաջ, երբ «Ադրբեջանի երկաթուղային ուղիներ» ՓԲԸ-ն որոշում էր ընդունել կրճատումներ սկսել եւ տղամարդ ուղեկցորդներին արտաքին չվերթներից փոխադրել ներքին չվերթներ: