Կառավարությունը կնպաստի Ռուբեն Վարդանյանի իրականացնելիք Դիլիջանի զարգացման ծրագրերին. ՀՀ վարչապետ

Տավուշի մարզում գտնվող ՀՀ վարչապետ Հովիկ Աբրահամյանը այցելեց Դիլիջանի միջազգային դպրոց: Վարչապետին ուղեկցում են ՀՀ տարածքային կառավարման նախարար, փոխվարչապետ Արմեն Գևորգյանը, Տավուշի մարզպետը, Դիլիջանի քաղաքապետը, Դիլիջանի միջազգային դպրոցի տնօրենը: «Արմենպրես»-ի փոխանցմամբ’ Հովիկ Աբրահամյանը շրջայց կատարեց դպրոցում, ծանոթացավ դրա կառուցման ավարտական աշխատանքներին:

Նա եղավ դպրոցի վարչական և ուսումնական հատվածներում, շրջեց ժամանակակից լսարաններում, գրադարանում, ուր աշխատանքները թևակոխել են վերջնական փուլ: Դիլիջանի միջազգային դպրոցի տնօրենի հետ զրույցում վարչապետը խոստացավ յուրաքանչյուր խնդրի դեպքում աջակցել:

«Կառավարությունն ամեն ինչ անելու է, որ այս ծրագիրն իրականանա: Ես համոզվածմ եմ, որ այն կնպաստի Դիլիջան քաղաքի ու տարածաշրջանի զարգացմանը: Տեղյակ եմ նաև, որ Ռուբեն Վարդանյանը բազմաթիվ ծրագրեր ունի քաղաքի զարգացման համար, և մենք նպաստելու ենք, որ այդ ծրագրերն իրականան: Եթե կլինեն խնդիրներ’ անպայման դրանց լուծում կտանք»,-ասաց Հովիկ Աբրահամյանը:

Դիլիջանի միջազգային դպրոցի տնօրեն Ջոն Պաըֆութի խոսքով’ դպրոցը սեպտեմբերին պատրաստ կլինի ընդունել 98 ուսանողի50 երկրից: Դիլիջանի միջազգային դպրոցում կուսանի 10 աշակերտ Հայաստանից, 8-ը’ Ռուսատանից, 2-ը’ Վրաստանից, 4-ը’ Թուրքիայից և այլն:

Դիլիջանի միջազգային դպրոցի շենքի շինարարությունն սկսվել է 2012-ին։ Դպրոցի կապիտալ շինարարության և կահավորման բյուջեն կազմում է մոտ 190 միլիոն դոլար: Դպրոցի 64 հազար քառակուսի մետր ընդհանուր տարածքում գործելու է մեծ համալիր’ ժամանակակից սպասարկման նոր մեթոդների կիրառմամբ։ Նախատեսվում է, որ 2023 թվականին աշակերտների թիվը կհասնի 650-ի: