Թշնամու «արհամարհող» կրակոցի, հայկական կողմի հակահարվածի, սահմանապահ գյուղացու հերոսության ու միջնորդների ներողամտության մասին

Հուլիսի 25-ին հակառակորդը մի քանի ժամ կրակի տակ է պահել Տավուշի մարզի սահմանամերձ Մովսես, Ներքին Կարմիրաղբյուր, Այգեպար, Չինարի գյուղերը, բարեբախտաբար, հայկական կողմից կորուստներ չկան:

Times.am-ի հետ զրույցում Չինարիի գյուղապետ Սամվել Սաղոյանը երեկվա մասին կարճ խոսեց.

«Հիմա նորմալ է, երեկվա հետ կապված ավերվածությունները շատ են, բայց կարևորը զոհ չունենք: Կներես, հոգնած եմ, ավել բան չեմ կարող ասել»:

Իր հերթին Մովսեսի գյուղապետ Արարատ Ավալյանն ասաց.

«20.30-21.00-ից սկսել են մինչև 24.00-ն: Վնասների չափը հստակ չեմ կարող ասել, գիտեմ, որ տանիքներ, մեկի լյուստրան է ջարդել: Դե մերոնք էլ պատասխանել են, իրենք էլ արդեն լռել: Բա հո առանց պատասխանի չէի՞նք թողնելու: Ի դեպ, լրագրողներն անընդհատ հարցնում են, թե ինչով է այս ակտիվությունը պայմանավորված, էս ակտիվությունը 25 տարի է կա, մենակ զենքերն են փոխվել, այսինքն՝ մի ժամանակ փոքր տրամաչափի զենքից էին կրակում, իսկ հիմա խոշոր, մի ժամանակ ՊԿ-ից, հիմա ԴՇԿ-ից, ուրիշ զենքերից: Սա է տարբերությունը»:

Հակադարձմանը՝ պաշտպանության նախարար Սեյրան Օհանյանն ակնարկեց, թե սահմանամերձ գյուղի բնակիչներին պետք է զենք տալ, նախագահ Սերժ Սարգսյանը սրան դեմ էր արտահայտվել՝ արձագանքելով  Հանրային խորհրդի նախագահ Վազգեն Մանուկյանի դիտարկմանը:

«Ես իմաստ չեմ տեսնում այսօր մեր սահմանամերձ գյուղերի բնակիչներին զենք բաժանե՞նք, իմաստը ինչո՞ւմն է»,- ասել էր Սարգսյանը։

«Եթե նախագահը դեմ է, վերնախավն է դեմ է, կարիքը չկա, որ ես… Գերագույն գլխավոր հրամանատարը գիտի, կտան կտան, չեն տա, ուրեմն՝ մեր բանակը մեզ պաշտպան»,-համապատասխան հարցադրմանն ի պատասխան արձագանքեց Արարատ Ավալյանը:

Ի դեպ, երեկ ուշ գիշեր հայկական կողմի պատասխան գործողություններից հետո haqqin.az-ը խոսեց երկու վիրավորի մասին՝ Ալիբեյլիի բնակիչ 52-ամյա Անյա Ալեկպերովա և Տավուշի մարզին սահմանակից ադրբեջանական Թովուզի շրջանի բնակիչ, 1997-ին ծնված Ֆարիդ Մամեդով, սակայն, ակտիվ կերպով տարածվեց Մամեդովի լուսանկարը:

ՀՀ պաշտպանության նախարարի մամուլի քարտուղար Արծրուն Հովհաննիսյանի խոսքերով՝ հայկական կողմն արձագանքել է, երբ թշնամին սկսել է կանոնավոր և նպատակային կրակոցներ արձակել.

«Բարեբախտաբար, հայկական կողմը զոհեր ու վիրավորներ չունի, հակառակորդն ունի վիրավորներ, որոնց մասին ոչինչ ասել չենք կարող»,-ասաց նա:

Հիշեցնենք, որ օրեր առաջ ԵԱՀԿ Մինսկի խմբի համանախագահները  հանդես էին եկել հայտարարությամբ՝ խորը մտահոգություն հայտնելով սահմանային լարվածության և բռնությունների աճի, այդ թվում՝ քաղաքացիական անձանց նպատակաուղղված սպանությունների հետ կապված: Համանախագահները կողմերին կոչ էին արել կատարել մարդկային զոհերից խուսափելու  պարտավորվածություններն՝ անընդունելի համարելով գյուղերի և քաղաքացիական անձանց՝ նպատակաուղղված թիրախավորումը:

Բայց ինչպես տեսնում ենք, ադրբեջանական կողմին այս կոչ-հորդորները բացարձակ չեն հետաքրքրում, թերևս, նրանից է, որ այդ արհամարհանքը նրանց ներվում է հենց  հայտարարության հեղինակների կողմից:

Հ.Գ. Ի պատասխան տարածվող խուճապին և այլ խոսակցություններին, թե մենք լավ չենք պատասխանում, մի դեպք եմ ուզում պատմել, որը լսել եմ ՀՀ ԶՈՒ ԳՇ ներկայացուցիչ գնդապետ Անդրանիկ Մկրտումյանից և, որը ներկայացվել է ԵԱՀԿ ներկայացուցիչներին և, որից ադրբեջանական կողմը հիստերիայի մեջ էր ընկել:

 «Մեր զինվորները մի օր տեսել են, թե ինչպես են ադրբեջանական կողմի սահմանամերձ գյուղի բնակիչները քարեր և փայտեր նետում ադրբեջանցի զինվորների վրա, այն պահին, երբ նրանք փորձում էին մեր հենակետերի ուղղությամբ կրակել’ հայտարարելով. «Հերիք է մեր որդիների կյանքը վտանգեք»: Այս մարդիկ լավ գիտեն, որ հրահրողն Ադրբեջանն է, իսկ պատասխան գործողություններից զգալի կորուստներ են ունենալու»:

http://haynews.am/hy/1343303416

ՄԱՐԻԱՄ ՊԵՏՐՈՍՅԱՆ

 

 

 

Հետևեք մեզ նաև Telegram-ում